Պաշտոնեական դիրքի չարաշահման մեջ կասկածվող ՔՊ-ականներն անձեռնմխելի՞ են

2018 թվականի հեղափոխության օրերին Նիկոլ Փաշինյանը հրապարակում հավաքված քաղաքացիներին ի թիվ այլ խոստումների՝ խոստացել էր նաև այն, որ եթե իր թիմակիցներից որևէ մեկի մասով հետագայում անգամ կասկած ի հայտ գա կապված պաշտոնեական դիրքի չարաշահման հետ՝ այդ թիմակիցը անհապաղ ազատվելու է զբաղեցրած պաշտոնից: Անցավ չորս տարի, Նիկոլ Փաշինյանի բազմաթիվ թիմակիցներ ոչ միայն կասկածվել են, այլ նաև շատ հստակ մեղադրվել են վերը նշված զանցանքում, սակայն պաշտոնից ազատման դիմումներ հպարտ քաղաքացիները դեռևս չեն տեսել:

Դիցուք՝ Աջափնյակ վարչական շրջանի նախկին ղեկավար Գևորգ Բաբայանը, որը մեղադրվում էր կոռուպցիոն հանցագործություն կատարելու համար, ոչ միայն չպատժվեց, այլ նշանակվել է Տարածքային կառավարման և ենթակառուցվածքների նախարարության պետական գույքի կառավարման կոմիտեի նախագահի տեղակալ:

ՀՀ կառավարության 2019 թվականի որոշման հիման վրա՝ պաշտպանված բնակարաններ եւ փոքր տներ ձեռք բերելու նպատակով ՀՀ աշխատանքի եւ սոցիալական հարցերով նախարարությանը հատկացրել է գումար, որպեսզի նախարարությունը հայտարարի մրցույթ, որի արդյունքում կոնկրետ ընկերություն հաղթել է մրցույթը: Եվ, ահա, այս ամենից հետո նախարարությունը պետք է տարեցներին պաշտպանված տներ ձեռք բերելու գործընթացը կազմակերպեր, սակայն  ավելի ուշ իրավապահները բացահայտել են, որ նախարարության կողմից բնակարանները ձեռք են բերվել շուկայական արժեքից թանկ գնով: Այդ ժամանակ նախարար էր Զարուհի Բաթոյանը, ով այժմ էլ պատգամավորի աթոռն է զբաղեցնում:

Վայքում համայնքի ղեկավարի ԺՊ նշանակված Գարիկ Սարգսյանը նախընտրական շրջանում, ըստ իրավապաշտպանների,  չարաշահել է Վայքի համայնքային մեդիա ռեսուրսը: Բացի այդ, Վայքում ՔՊ-ականները քրեորեն արգելված բարեգործություն են արել։

Առողջապահության նախարար Անահիտ Ավանեսյանն իր՝ մարզային գործուղումներն ուղղաթիռով՝ Սանավիացիայով է իրականացրել, ինչը նույնպես պաշտոնեական դիրքի չարաշահում է: Համեմատության համար նշենք, որ Ղազախստանի առողջապահության նախարարն ընդամենն ամիսներ առաջ պաշտոնանկ է արվել Սանավիացիայի օդանավից օգտվելու համար եւ այժմ մեղադրվում է պաշտոնեական դիրքի չարաշահման համար։ Նույն սցենարը Հայաստանի պարագայում, իհարկե, չի գործի, քանզի իշխանությունը կադրային լուրջ խնդիր ունի:

ՔՊ-ական պատգամավորներն ու նրանց օգնականները Ազգային ժողովը դարձրել են սեփական դուքանը, որտեղ ում խելքին ինչ փչում, այն էլ անում է՝ մոռանալով, որ աշխատում են պետության թիվ մեկ քաղաքական` օրենսդիր մարմնում, որն անգամ աշխատանքային դրեսկոդ է սահմանում։ Նախօրեին մեծ աղմուկ բարձրացավ Հայկ Կոնջորյանի օգնականի՝ փուչիկներով լուսանկարների պատճառով: Օգնականը որոշել էր հավերժացնել իր ծննդյան օրը՝ ԱԺ շենքի դիմաց լուսանկարվելով:

Երևանի քաղաքապետի ընտրություններին որոշ ընտրական տեղամասերի հանձանաժողովների նախագահները, քարտուղարները Շիրակի մարզպետի աշխատակազմի տարբեր պաշտոններ զբաղեցնող ՔՊ-ական պաշտոնյաներն էին, ովքեր գործուղվել էին Երևան։  Երևան գործուղված պաշտոնյաների մեջ էր նաև Շիրակի մարզպետի խորհրդական Լիլիթ Մուրադյանը, հանձնաժողովի մի քանի անդամներ էլ Գյումրիի քաղաքապետարանից են։ 

ԱԺ «Քաղաքացիական պայմանագիր» խմբակցության քարտուղար Արթուր Հովհաննիսյանը դեռեւս 2021 թվականին պետությունից գումար է ստացել՝ որպես տան վարձավճարի փոխհատուցում. սա այն դեպքում, երբ նա, համաձայն իր պաշտոնական կենսագրության, ծնվել եւ ապրել է Երեւանում:

Վայոց ձորի մարզի Վայք համայնքի ղեկավար Մխիթար Մաթևոսյանն ընդհանուր 537 միլիոն դրամի պայմանագրեր է կնքել իր կնոջը պատկանող ընկերության հետ, ընդ որում՝ մինչև 2022 թվականն այդ ընկերությունը ղեկավարել է հենց ինքը՝ Մխիթար Մաթևոսյանը, սակայն համայնքի ղեկավար ընտրվելուց հետո ընկերության իր բաժնեմասն ու կառավարումը հանձնել է կնոջը՝ Մերի Մարգարյանին։ Պետական գնումների armeps.am համակարգի տվյալներով՝ 2022 թվականի ընթացքում Վայքի համայնքապետարանը՝ ի դեմս Մխիթար Մաթևոսյանի, 4 պայմանագիր է կնքել «Մավշին» ՍՊԸ-ի հետ։ Հունիսի 1-ի պայմանագրով՝ ընկերությունը 6,5 միլիոն դրամի դիմաց Վայք քաղաքի բազմաբնակարան շենքերի տարածքներում փոսալցումներ է կատարել։