Ուր են և ինչու են լռում Հայաստանի խոշոր գործարարներն ու պաշտոնյաները. Մուշեղ Մուրադյան

ԼՈւՐԵՐ.com-ը շարունակում է անդրադառնալ այն պաշտոնյաներին և գործարարներին, ովքեր երկար տարի զբաղեցրել են պետական և ռազմական պաշտոններ, Արցախի և Հայաստանի անունը հոլովելով բիզնես են դիզել, իսկ այսօր, երբ Արցախը գրեթե կորսված է, իսկ Հայաստանը գտնվում է լրջագույն վտանգների առջև, նրանք նախընտրում են լռել, ասես ոչինչ էլ տեղի չի ունեցել:

Այսօր կանդրադառնանք Շիրակի մարզպետ Մուշեղ Մուրադյանին: Ահա նրա կենսագրությունից որոշ ուշագրավ դրվագներ․

1997-2000 թթ․- «Շիրակինվեստբանկ» ՍՊԸ «Աշոցք» մասնաճյուղի ակտիվապասիվային գործառնությունների բաժնի մասնագետ,

2000-2005 թթ․ - Ձեռնարկատիրական գործունեություն-ֆերմերային տնտեսությունում,

2005-2006 թթ․- «Հայէկոնոմբանկ» ԲԲԸ «Բավրա» մասնաճյուղի կառավարիչ,

2007 թ․ մայիս-նոյեմբեր- «ԲՏԱինվեստբանկի» Գյումրու մասնաճյուղի վարկային բաժնի գլխավոր մասնագետ,

2007 թ. փետրվար-հունիս - «Արթիկ պոլիկլինիկա» ՓԲԸ-ի վերստուգող,

2008-2010 թթ․- «Գյումրու «Բեռլին» պոլիկլինիկա», «Աղինի առողջության կենտրոն», «Անի Պեմզայի առողջության կենտրոն» ՓԲԸ-ների վերստուգող,

2010-2012 թթ․- «Գյումրու Գ. Գյուլբեկյանի անվան վիրաբուժական հիվանդանոց», «Ախուրիկի առողջության կենտրոն» ՓԲԸ-ների վերստուգող,

2013-2018 թթ․ - ՀՀ Շիրակի մարզպետարանի աշխատակազմի ներքին աուդիտի բաժնի գլխավոր մասնագետ,

2018-2019 թթ․- ՀՀ Շիրակի մարզպետարանի ներքին աուդիտի բաժնի պետ,

2018-2019 թթ․- ՀՀ Շիրակի մարզպետարանի ներքին և արտաքին ազդարարման համակարգի պատասխանատու,

2019-2023 թթ․- Շրջակա միջավայրի նախարարության «Արփի լիճ» ազգային պարկ» ՊՈԱԿ-ի տնօրեն,

2023 թ․ հունվարի 26-ին նշանակվել է Շիրակի մարզպետ: Մուրադյանը նաև այն եզակի պաշտոնյաներից է, ով ծառայել է բանակում: Ավելին՝ ունի ՀՀ ՔԾ 2-րդ դասի խորհրդականի դասային աստիճան:

Մուրադյանը նախկինում բավական միանշանակ է արտահայտվել ՀՀ անվտանգության մասով՝ նշելով, որ այն հարվածի տակ դնելն անթույլատրելի է:  Բացի այդ, նա վստահ էր, որ արցախցի մեր հայրենակիցներն ունեն իրենց հողում ապրելու իրավունք և այդ իրավունքը պետք է իրացնեն: Արցախի վերջնական կորստից հետո Շիրակում բազմաթիվ արցախցիներ են հանգրվանել: Նոյեմբերի 2-ի դրությամբ մարզում ապրում են ԼՂ-ից բռնի տեղահանված 3981 քաղաքացի՝ 998 ընտանիք։ Համայնքներում տեղաբաշխվածությունը հետևյալն է. Գյումրիում՝ 2630 անձ, 634 ընտանիք, Արթիկում՝ 412 անձ, 117 ընտանիք, Աշոցքում՝ 104 անձ, 27 ընտանիք, Անիում՝ 329 անձ, 91 ընտանիք, Ամասիայում՝ 97 անձ, 28 ընտանիք, Ախուրյանում՝ 490 անձ, 101 ընտանիք:

Ինքը՝ Մուրադյանը, տեղեկացրել էր, որ թե՛ համայնքներում, թե՛ մարզպետի աշխատակազմում 24/7 աշխատանքային գրաֆիկով հերթապահություն էր ստեղծվել, աշխատանքային խմբեր էին ձևավորվել, բացի դրանից, մարզպետի աշխատակազմում երկրորդ աշխատանքային խումբն էր ձևավորվել, որոնք արդեն իսկ զբաղվում էին մարդկանց աջակցելու, օգնելու, առաջնահերթ կարիքները հապճեպ լուծելու գործով։

Սա, անշուշտ, շատ գովելի է, սակայն արդյո՞ք Մուշեղ Մուրադյանը որպես բարձրաստիճան պետական պաշտոնյա՝ մարզպետ, չպետք է առնվազն քաղաքացիական գնահատական տա այն ամենին ինչ այսօր տեղի է ունենում Արցախում և Հայաստանում: Ի վերջո հազարավոր արցախցիներ հոժարակամ չեն հայտնվել Շիրակի մարզում և այս իրավիճակը ի հայտ է եկել հենց Մուրադյանի քաղաքական թիմի ձախողման արդյունքում: Սակայն, մինչ այս պահը մարզպետը նախընտրում է լռել, ինչը, մեղմ ասած, տարակուսանք է առաջացնում:

Շարունակելի...