Ո՞ւմ է ձեռնտու ԶԼՄ-ի մասին նոր օրենքի նախագիծը՝ ժողովրդի՞ն, թե անձամբ Նիկոլ Փաշինյանին

Արդարադատության նախարարությունը «Զանգվածային լրատվության մասին» օրենքում փոփոխությունների նախագիծ է դրել շրջանառության մեջ։ Օրենքում նախատեսվում է, որ պետք է ստեղծվի «Մեդիա խորհուրդ», որը պետք է ուսումնասիրի ու «ճանաչի» ԶԼՄ-ների էթիկայի վարքականոնները։ Այդ խորհուրդը պետք է ձևավորեն Հայաստանում 15 տարվա փորձ ունեցող այն ՀԿ-ները, որոնք զբաղվել են ԶԼՄ-ների իրավունքների պաշտպանությամբ։ Այդպիսի ՀԿ-ներ են «Խոսքի ազատության պաշտպանության կոմիտեն», «Ինֆորմացիայի ազատության կենտրոնը» և այլն, այս ՀԿ-ները հայտնի են որպես արևմտյան գրանտերով սնվող ՀԿ-ներ։ Ի դեպ, նախագիծն էլ մշակվել է այդ ՀԿ-ների մասնակցությամբ՝ «ԶԼՄ-ների դիտորդ մարմնի» փորձագետների հետ համատեղ։ 

Եթե կարճ, ապա սա նշանակում է, որ իշխանությունն իր կողմից դրածո հանձնաժողովի ձեռքով անցանկալի լրատվամիջոցներին, և ոչ միայն նրանց, չի ճանաչի հանրային իրազեկման միջոց տարածող և պարզապես կզրկի աշխատելու հնարավորությունից: Այս փոփոխությունները միտված են ազատ մեդիան սահմանափակելուն, ԶԼՄ-ների գործունեությունը սահմանափակելուն:

Հարց է առաջանում՝ իսկ ո՞ւմ է ձեռնտու նման փոփոխությունը՝ ժողովրդի՞ն, որին հեղափոխության օրերին խոստանում էին խոսքի աննախադեպ ազատություն, թափանցիկություն և հասանելիություն կարևոր ինֆորմացիային, թե Նիկոլ Փաշինյանին և ՔՊ-ին, ովքեր փորձում են լռեցնել ԶԼՄ-ին, զրոյի հասցնել հնարավոր ցանկացած քննադատություն իրենց քաղաքական թիմի հասցեին: Հասկանալի է, որ հանրությունը և լրատվամիջոցներն այս դեպքում ոչինչ չեն շահում, հակառակը՝ հայտնվում են մի իրավիճակում, երբ խոստացված ժողովրդական արժեքների փոխարեն նրանց են հրամցվում ավտորիտար վարչակարգերին բնորոշ կարգավորումներ: Մինչդեռ Փաշինյանին և իր թիմին նման կարգավորումներն օդի և ջրի պես են անհրաժեշտ: Գրեթե շաբաթ չկա, որ հեղափոխական պաշտոնյաները չհայտնվեն աղմկահարույց սկանդալների, կոռուպցիոն պատմությունների կիզակետում: Դա էլ բավարար չէ, ԶԼՄ-ներն սկսել են ավելի ակտիվ ջրի երես հանել այս իշխանության ներկայացուցիչների զանազան քաջագործություններ: Եվ բնական է, որ օրենքի փոփոխության նման նախագծի առաջ քաշելով՝ ՔՊ-ն և Փաշինյանը առաջնորդվում են առաջին հերթին իրենց նեղ, խմբային քաղաքական շահերով: