Որ պաշտոնյաների «թեթև ձեռամբ» է հարված հասցվել քաղաքացիների գրպանին

Հեղափոխության օրերին Նիկոլ Փաշինյանը հայտարարում էր, որ քաղաքացին տուգանքի մատերիալ չէ, իսկ հեղափոխության հաղթանակի դեպքում խոստանում էր նվազեցնել հարկերը և չհարվածել քաղաքացիների գրպանին, հակառակը՝ նպաստել նրանց բարեկեցության բարձրացմանը: Այն, ինչ եղավ ընդամենը հինգ տարի անց, անչափ հուզիչ էր՝ այն պարզ պատճառով, որ Փաշինյանը և թիմակիցները, կարծես թե, մտափոխվել են և Նոր Հայաստանում հենց հպարտ քաղաքացիների հաշվին է լցվում բյուջեն:

Առաջին հարվածը վարորդների գրպանին էր: Դա այսպես կոչված՝ բալային համակարգի ներդրումն էր, որի գլխավոր լոբբիստներից էր ՔՊ-ական պատգամավոր Արմեն Խաչատրյանը:

ԱԺ թեթե ձեռամբ թանկացավ նաև գույքահարկը` դոմինոյի էֆֆեկտով թանկացումներ առաջացնելով նաև մյուս ոլորտներում: Նախագծի հեղինակները «Իմ քայլը» խմբակցության պատգամավորներ Գևորգ Պապոյանն ու Արգիշտի Մեխակյանն էին  (արդեն նախկին պատգամավոր։

Էլեկտրոնային առողջապահության համակարգին չմիանալը նույն ԱԺ թեթե ձեռամբ այսուհետ առաջացնում է տուգանք` 30․000 – 50․000 դրամի չափով: Պարտադիր վարման ենթակա բժշկական (այդ թվում` էլեկտրոնային) փաստաթղթեր չվարելն առաջացնում է տուգանք` 50․000 – 60․000 դրամի չափով: Իսկ նույն արարքը կրկին կատարելը վարչական տույժի միջոց կիրառելուց հետո` մեկ տարվա ընթացքում, առաջացնում է տուգանք` 70․000 – 100․000 դրամի չափով:

ՔՊ-ականների թեթև ձեռքով որոշվել է, որ Հայաստանում մի շարք ապրանքների ակցիզային հարկի դրույքաչափերը նույնպես կբարձրանան։ Ազգային ժողովը հունվարի 13-ի լիագումար նիստում առաջին ընթերցմամբ քննարկում է ՀՀ Հարկային օրենսգրքում և Վարչական իրավախախտումների վերաբերյալ օրենսգրքում կատարվող փոփոխությունները: Զեկուցողը ֆինանսների նախարարի տեղակալ Արման Պողոսյանն էր:

Երևանի քաղաքապետարանը պատրաստվում է եկող տարվանից Երևանի կենտրոնում այսպես կոչված՝ կարմիր գծերի վարձը սահմանել տարեկան 160 հազար դրամ՝ նախկին 12 հազարի փոխարեն:

Աուդիտորների պալատի նախագահ Նաիրի Սարգսյանն ասել է, որ հաջորդ տարի իշխանությունները բերելու են օրենքի նախագիծ, որ ամբողջ կրթական եւ առողջապահական ոլորտները, որոնք ներկայում ազատված են ավելացված արժեքի հարկից, կսկսեն հարկվել: Սա նշանակում է հիվանդանոցային ծառայությունների, համալսարանների եւ վճարովի մանկապարտեզների ու դպրոցների վճարների 20 տոկոսով թանկացում:

Հայաստանի ավտոապահովագրողների բյուրոն որոշում է կայացրել վերանայել ԱՊՊԱ-ի արժեքը, ինչի արդյունքում կբարձրացվեն բազային սակագները, ինչպես նաև փոփոխություններ կկատարվեն ապահովագրության արժեքի հաշվարկման համակարգում: Բյուրոյի ղեկավարը Արմեն Նուրբեկյանն է:

Առողջապահության նախկին նախարար, ԱԺ պատգամավոր, «Քաղաքացիական պայմանագիր» խմբակցության անդամ Արսեն Թորոսյանն էլ արդեն խորհրդարանում է որոշել հարածել քաղաքացիների գրպանին, հենց նրա հուշումով և լոբբինգի արդյունքում է առաջ մղվել ավտոմեքենաների ապակիների մգեցված թաղանթապատումը հանելու մասին որոշումը, որին չենթարկվելու դեպքում վարորդները կտուգանվեն կլորիկ գումարներով:

Վերջերս կառավարությունում, հասարակության աչքից ու ականջից հեռու, մի որոշում են ընդունել, որով հաստատել են հարկային եկամուտների կառավարման ծրագիրը։ Այն վերաբերում է առաջիկա 3 տարիների հարկային քաղաքականությանը։ Կառավարությունը պատրաստվում է ընդլայնել հարկման բազան, կրճատել հարկային արտոնությունները, բարձացնել հարկային բեռը, վերանայել հարկերի ու պարտադիր վճարների քանակը։ Վերջինը, բնականաբար, վերաբերում է դրանց ավելացմանը։

Էկոնոմիկայի նախարար Վահան Քերոբյանի անգործության և ընդունած որոշման արդյունքում գյուղատնտեսությամբ զբաղվողների համար պարարտանյութը և թունաքիմիկատները կտրուկ թանկացել են` հասնելով ընդհուպ 20 հազար դրամի:

Հարկերի կամ պարտադիր վճարների թվաքանակի ավելացման պարագայում էլ կառավարությունը դիտարկում է նոր հարկերի կամ պարտադիր վճարների ներմուծում։ Խոսքն առաջին հերթին վերաբերում է եկամուտների համընդհանուր հայտարարագրմանը։ Ըստ ֆիննախի՝ արդեն 2024թ. նախատեսվում է, որ այդ համակարգը կսկսի աշխատել. նախորդ տարվա եկամուտների հիման վրա կներկայացվեն եկամուտների հայտարարագրերը։ Ներկայացված հայտարարագրերի հիման վրա էլ ակնկալվում է հարկել մարդկանց եկամուտները։ Այդ թվում՝ այն եկամուտները, որոնք ստացվել են, ասենք, արտագնա աշխատանքի կամ օգնության տեսքով դրսից հարազատների կատարած փոխանցումների տեսքով։