Իրանի տարածքով տրանսպորտային նախագծի իրականացումը չի նշանակում, որ ՀՀ–ով երթուղին այլևս չի դիտարկվելու․ Հաջիև

Հայաստանով երթուղին Երեւանի պարտավորությունն է, որը նրանք պետք է կատարեն։ Այլ բառերով՝ Pacta sunt servanda։ Այս մասին գերմանական Berliner Zeitung թերթին տված հարցազրույցում ասել է Ադրբեջանի նախագահի օգնական Հիքմեթ Հաջիևը։

«Միջազգային պրակտիկան և մարդասիրական սկզբունքները Հայաստանից պահանջում են նաև դադարեցնել Նախիջևանի շրջափակումը Ադրբեջանի մայրցամաքային տարածքից: Առայժմ Հայաստանից որևէ մասնակցություն չենք տեսնում։ Ընդհակառակը, Հայաստանը, նախաձեռնելով «Խաղաղության խաչմերուկ» նախագիծը, փորձում է շեղվել եռակողմ հայտարարությունից բխող պարտավորություններից և կեղծ կերպով ներկայանալ որպես տարածաշրջանի ապաշրջափակմանը եռանդուն աջակցող կողմ։ Բայց իրականում հենց Հայաստանն է շարունակում խոչընդոտել տարածաշրջանում հաղորդակցությունների բացմանը»,– ասել է նա։

Նա հայտարարել է, որ «միջանցք» տերմինը չպետք է վախեցնի Հայաստանին։

«Հայաստանի տարածքով փոխադրումները մենք չենք դիտարկում որպես Հայաստանի ինքնիշխանության և հայ-իրանական կապերի համար սպառնալիք։ Քանի որ Ադրբեջանի և Նախիջևանի միջև տրանսպորտային կապը Հայաստանի հարավով չի ազդի Հայաստանի և Իրանի միջև առևտրային ուղու վրա։ Այս երկու երթուղիները հատվում են առանց միմյանց արգելափակելու։ Միշտ էլ հնարավոր է ընդունելի պայմաններ գտնել, եթե դրա համար կա քաղաքական կամք։ «Միջանցք» տերմինը չպետք է վախեցնի Հայաստանին, քանի որ այն լայնորեն կիրառվում է տրանսպորտային ուղիների համատեքստում։ Տրանսպորտային այս կապը Հայաստանին չի զրկի Իրանի հետ սահմանից։ Այս երթուղին նաև Հայաստանը երկու մասի չի բաժանի։ Ցավոք սրտի, այստեղ մենք տեսնում ենք լայնածավալ զրպարտչական արշավ իմ երկրի դեմ, հատկապես որոշ արևմտյան լրատվամիջոցներում»,– նշել է Հաջիևը։

«Իրանցի մեր գործընկերների հետ մենք այլընտրանքային ճանապարհ ենք կառուցում դեպի Նախիջեւան՝ Իրանի տարածքով։ Այն, որ Երևանն այս դեպքում դուրս է մնալու տարածաշրջանային փոխգործակցության նոր նախագծից, կարելի է բացատրել միայն իր սեփական քաղաքականությամբ։

Հստակեցնեմ նաև, որ Իրանի տարածքով տրանսպորտային նախագծի իրականացումը չի նշանակում, որ Հայաստանով երթուղին այլևս չի դիտարկվելու։ Մենք պատրաստ ենք աշխատել Հայաստանի հետ այս առումով։ Միշտ ավելի լավ է ավելի շատ այլընտրանքներ ունենալ: Նախիջևանի հետ Հայաստանի տարածքով տրանսպորտային կապը չի ազդի նրա ինքնիշխանության վրա։ Այս թեմայի շուրջ հիստերիան լրիվ անհիմն է»,– հավելել է նա։