Երևանին հերթական պոպուլիստական «նվերն» արած Փարիզը միլիարդների պայմանագրեր է կնքում Բաքվի հետ

Ֆրանսիայի Սենատում երեկ Արցախի և Հայաստանի վերաբերյալ նոր բանաձև էր քննարկվում, որն ընդունվեց գրեթե միաձայն՝ 336 կողմ և 1 դեմ ձայներով։ Սենատի այս բանաձևը դատապարտում է Արցախում Ադրբեջանի ռազմական հարձակումն ու ագրեսիան, Հայաստանի Հանրապետության տարածքային ամբողջականության ոտնահարման հետագա փորձերը։ Այն պահանջում է Ադրբեջանի դեմ պատժամիջոցների կիրառում և ԼՂ հայ բնակչության վերադարձի իրավունքի երաշխիքների սահմանում։ Բանաձևը նաև վերահաստատում է Հայաստանի տարածքային ամբողջականության անձեռնմխելիությունը և կոչ է անում անհապաղ և անվերապահ դուրս բերել ադրբեջանական ուժերը Հայաստանի ինքնիշխան տարածքից։

Թեև իշխող ՔՊ ներկայացուցիչները փորձում են տիրաժավորել այս նորությունը իբրև Արևմուտքի՝ Հայաստանին ցուցաբերած օժանդակության հերթական վառ վկայություն, պետք է փաստենք, որ բանաձևն ունի զուտ խորհրդատվական նշանակություն և չունի իրավական պարտադիր ուժ: Սա նշանակում է, որ Ֆրանսիայի նախագահ Մակրոնը հանգիստ կարող է աչք փակել վերը նշված բանաձևի վրա, ինչ էլ նա ամիսներ շարունակ արել է՝ հաշվի առնելով, որ ընդունված բանաձևը բնավ էլ առաջինը չէ և, չգիտես ինչու, Փարիզը դեռևս չի շտապում սարսափեցնել Բաքվին իր կողմից կիրառված պատժամիջոցներով: Ավելին՝ Փարիզը Երևանին նման սիմվոլիկ աջակցության ժեստեր անելու ֆոնին խորացնում է տնտեսական համագործակցությունը Բաքվի հետ: Ընդամենն ամիսներ առաջ Իլհամ Ալիևն ընդունել էր Կասպից ծովում «Աբշերոն» գազային հանքավայրի շահագործման նախագծի իրականացման թույլտվություն ստացած՝ ֆրանսիական TotalEnergies ընկերության գլխավոր գործադիր տնօրեն Պատրիկ Պույանին։ Ըստ պաշտոնական հաղորդագրության՝ Ալիևին ներկայացվել է «Աբշերոն» հանքավայրում արդյունահանման մեկնարկի մասին։ Զրույցի ընթացքում մտքերի փոխանակություն է տեղի ունեցել Ադրբեջանում «Total Energies»-ի գործունեության ընդլայնման, այդ թվում՝ «Աբշերոն» հանքավայրի լայնածավալ զարգացման փուլին անցնելու շուրջ։

Բացի այդ, 2023 թվականի հունվար-հունիսին Ադրբեջանի արտահանումը Ֆրանսիա կազմել է 126 մլն 747 հազար դոլար։ Սա 57 անգամ կամ 124,5 մլն դոլարով ավելի է նախորդ տարվա առաջին վեց ամիսների ցուցանիշից․ 2022 թվականի հունվար-հունիսին Ադրբեջանից Ֆրանսիա է արտահանվել 2,2 մլն դոլարի ապրանք։ Երկու երկրների միջև վերջին խոշոր գործարքներից է նաև «Ադրբեջանական ավիաուղիների» (AZAL) և ֆրանսիական «Airbus» ընկերության միջև պայմանագրի կնքումը՝ նոր ինքնաթիռների ձեռքբերման համար։ Այս պայմանագրով «AZAL»-ը պատվիրել է 12 «Airbus» ինքնաթիռ, այդ թվում՝ A320neo և A321neo: Հաշվարկները ցույց են տալիս, որ «AZAL»-ը 12 ինքնաթիռի համար վճարելու է 1,3-1,5 միլիարդ դոլար։

Ինչպես երևում է՝ Արևմուտքի հուժկու օգնության վրա հույս դրած Փաշինյանին և նրա թիմակիցներին հերթական հիասթափությունն է սպասվում: Փարիզը Հայաստանին փայ է հանում միայն նման՝ սիմվոլիկ և ինչ-որ տեղ նաև պոպուլիստական, զրո հետևանք և արդյունք ունեցող  հաճելի բոնուսներ, իսկ ահա Ադրբեջանի հետ խորացնում է իր տնտեսական կապերն ու համագործակցությունը:

Այս թեմայով «Դուք կարողացաք այս ծանր օրերին մեր հանրությանը հպարտություն և հաղթանակ պարգևել». Գագիկ Ծառուկյանը պարգևատրեց Փարիզ-2024-ի մեդալակիրներին «Դուք կարողացաք այս ծանր օրերին մեր հանրությանը հպարտություն և հաղթանակ պարգևել». Գագիկ Ծառուկյանը պարգևատրեց Փարիզ-2024-ի մեդալակիրներին «Դուք կարողացաք այս ծանր օրերին մեր հանրությանը հպարտություն և հաղթանակ պարգևել». Գագիկ Ծառուկյանը պարգևատրեց Փարիզ-2024-ի մեդալակիրներին Լույս է տեսել հոդված, որտեղ Շուշին ներկայացվում է որպես ադրբեջանական քաղաք՝ ստանալով «Փոքրիկ Փարիզ» անվանումը Հռիփսիմե Գրիգորյանը կգործուղվի Փարիզ՝ մասնակցելու ԵԽԽՎ հանձնաժողովի նիստին