ՔՊ-ականների կասկածելի որոշումները՝ խոշորացույցի տակ. Մխիթար Մաթևոսյան

Շարունակելով ներկայացնել կասկածելի որոշումներով աչքի ընկած պաշտոնյաներին՝ այսօր կանդրադառնանք Վայքի համայնքապետ Մխիթար Մաթևոսյանին:

Մաթևոսյանն ընդհանուր 537 միլիոն դրամի պայմանագրեր է կնքել իր կնոջը պատկանող ընկերության հետ, ընդ որում՝ մինչև 2022 թվականն այդ ընկերությունը ղեկավարել է հենց ինքը՝ Մխիթար Մաթևոսյանը, սակայն համայնքի ղեկավար ընտրվելուց հետո ընկերության իր բաժնեմասն ու կառավարումը հանձնել է կնոջը՝ Մերի Մարգարյանին։

Պետական գնումների armeps.am համակարգի տվյալներով՝ 2022 թվականի ընթացքում Վայքի համայնքապետարանը՝ ի դեմս Մխիթար Մաթևոսյանի, 4 պայմանագիր է կնքել «Մավշին» ՍՊԸ-ի հետ։

Հունիսի 1-ի պայմանագրով՝ ընկերությունը 6,5 միլիոն դրամի դիմաց Վայք քաղաքի բազմաբնակարան շենքերի տարածքներում փոսալցումներ է կատարել։

Հունիսի 2-ի պայմանագրով «Մավշին» ՍՊԸ-ն 57 միլիոն դրամի դիմաց կատարել է Վայք քաղաքի Մայիսյան և Շինարարների փողոցի հիմնանորոգման աշխատանքները։

Հունիսի 6-ին կնքված պայմանագրով ընկերությունը ստացել է 67 միլիոն դրամ և պարտավորվել Զառիթափ գյուղում ոռոգման ցանց կառուցել։

Իսկ ամենախոշոր պայմանագիրը Վայքի համայնքապետարանի և «Մավշին» ՍՊԸ-ի միջև կնքվել է մեկ շաբաթ առաջ՝ օգոստոսի 4-ին։ Համայնքապետի կնոջ ընկերությունը համայնքային բյուջեից մոտ 405 միլիոն դրամ կստանա Վայք քաղաքի Շահումյան փողոցն ասֆալտապատելու համար։

2021-ին 43.698.000 դրամի պայմանագիր է կնքվել Գլաձոր համանքի Գետափ բնակավայրի ներհամայնքային ճանապարհի ասֆալտապատման համար։

2018-ին՝ հեղափոխությունից անմիջապես հետո, Մաթևոսյանի ՍՊԸ-ն 46 միլիոն դրամի պայմանագիր է կնքում Երևանի ՋԷԿ-ի հետ:

Իրավաբանական անձանց ռեգիստրի տվյալներով՝ «Մավշին» ՍՊԸ-ն 2013 թվականի հունվարի 16-ին հիմնադրել է Մխիթար Մաթևոսյանը` հայրենի Զառիթափ գյուղում։ Մինչև 2022 թվականի փետրվարի 16-ը ընկերության 100 տոկոս բաժնեմասը պատկանել է Մաթևոսյանին, սակայն դրանից հետո թե՛ իր բաժնեմասը, թե՛ տնօրենի պաշտոնը փոխանցել է կնոջը՝ Մերի Մարգարյանին։

Armeps.am համակարգի տվյալներով՝ մինչև Վայք համայնքի ղեկավար դառնալն էլ Մխիթար Մաթևոսյանի «Մավշին» ՍՊԸ-ն մասնակցել է պետական գնումների գործընթացին և պետական տարբեր մարմինների հետ կնքել 15 պայմանագիր, հիմնականում՝ Վայոց ձորի մարզպետարանի, Վայքի, Ջերմուկի, Եղեգնաձորի համայնքապետերանների հետ։ Նշված 15 պայմանագրերի ընդհանուր արժեքը կազմում է 345 միլիոն դրամ։ Շատ դեպքերում ընկերությունը մասնակցել է տենդերներին, սակայն չի հաղթել:

Այսինքն՝ հեղափոխությունից հետո ընդամենը մեկ տարվա ընթացքում, այն էլ պաշտոնը զբաղեցնելուց հետո, Մաթևոսյանի ընտանիքին պատկանող ՍՊԸ-ն ավելի շատ եկամուտ է ստացել, քան իր ողջ գործունեության ընթացքում: Եվ սա արդեն իսկ լուրջ վկայություն է այն բանի մասին, որ հեղափոխական պաշտոնյաների գործերը՝ ի տարբերություն շարքային հպարտ քաղաքացիների գործերի, հեղափոխությունից հետո կտրուկ լավացել են, վերջիններիս պատկանող բիզնեսները բարգավաճում են և նույնիսկ չեն էլ հայտնվում պատկան մարմինների ուշադրության կենտրոնում՝ չնայած ակնհայտ կոռուպցիոն ռիսկերի...