«Բանտախուց համար 6 կամ ճանապարհ դեպի Արցախ»․ Կարապետ Պողոսյանին արգելել են շփվել ԶԼՄ-ների հետ
Քաղաքական
Գյումրեցի ընդդիմադիր գործիչ, իրավապաշտպան Կարապետ Պողոսյանի տնային կալանքը դատարանի որոշմամբ փոփոխվեց վարչական հսկողության՝ ևս մեկ միլիոն ՀՀ դրամ գրավի ավելացմամբ։ Այս մասին MediaHub-ի հետ զրույցում ասաց Պողոսյանի կինը՝ Անգին Մալխասյանը, նշելով, որ հիմնական սահմանափակումը, որ կիրառեց դատարանը, այն է, որ ընդդիմադիր գործչին սոցիալական ցանցերով արգելվեց բոլոր տեսակի հրապարակումներ կատարելը։
«Սեպտեմբերի 24-ի նիստին դատավորը, մեկնաբանելով իր կողմից հրապարակած որոշումը, հայտարարեց, որ Կարապետն իրավունք չունի նաև որևէ լրատվական միջոցի հարցազրույց տալ։ Հետևաբար, միանշանակ կարող ենք պնդել, որ ամուսնուս նկատմամբ տեղի ունեցածն ամբողջապես քաղաքական հետապնդում է։ Այսինքն, նրան դատում են ֆեյսբուքյան ուղիղ հեռարձակման համար, որտեղ չկան հայհոյանքներ, կան կոպիտ բառեր, որոնք վերցված են օրվա կառավարիչների բառամթերքից, և երկրորդ, փաստացի նրան այս ամիսներին պատժեցին՝ սկզբում ազատազրկելով, իսկ հիմա խոսքի իր իրավունքն արտահայտելու հնարավորությունից զրկելով»,- նշեց նա։
Վարչական հսկողության մասին որևէ ժամկետներ չկան։ Պողոսյանի կինը վստահ է, որ իշխանությունները հնարավորինս փորձելու են երկար պահել այդ սահմանափակումները։
«Կարապետը այն ընդդիմադիրներից է, ով 2018-ից սկսած անզիջում կռիվ է տվել իշխանազավթիչների դեմ և երբեք, թեկուզ ընդդիմադիր դիրքերից, չի սպասարկել նրանց օրակարգը։ Մի փոքր գաղտնիք բացեմ. նա միշտ ասում է, որ Փաշինյանը սիրում է, որ իրեն հայհոյում են, կարևորը, որ հայհոյեն հենց Նիկոլի օրակարգով, իսկ երբ խոսում են կամ քննադատում են այդ օրակարգից դուրս, դա նրան հասցնում է հոգեկան նոպայի։ Կարապետի նկատմամբ իշխանական վրեժխնդրությունը պայմանավորված էր հենց այդ հանգամանքով, որ թուրքական ամենամեծ՝ երկրորդ արարի ժամանակ ավելի քիչ հարվածներ հասցվեն կառավարչին»։
Անգին Մալխասյանը նաև ընդգծեց, որ այդքանով հանդերձ ո՛չ կալանքը, ո՛չ սահմանափակումները որևէ կերպ չեն կարող կոտրել մի մարդու, ում համար հայրենիքից թանկ ոչինչ չկա։
«Նա ապրում է միմիայն Արցախի վերաազատագրման երազանքով։ Այժմ Կարապետը փորձում է ավարտին հասցնել «Բանտախուց համար 6 կամ ճանապարհ դեպի Արցախ» գիրքը, որը սկսել է գրել ազատազրկման ժամանակ։ Բացի ներկա իրադարձություններից, գրքում խոսում է ապագայի՝ Արցախ վերադառնալու ծրագրերից»,- հավելեց մեր զրուցակիցը։
Հունան Թադևոսյան
Ամենադիտված 
Սևանա լիճը դառնալու է համատեղ օգտագործման, հայ-ադրբեջանական սահմանը անցնելու է Սևանի մեջտեղով. Ադիբեկյան (տեսանյութ)
