Տարհանում իրականացնելու անհրաժեշտություն չկա ․ Ի՞նչ իրավիճակ է տիրում Լիբանանում․ ներկայացնում է Հակոբ Բագրատունին

Լիբանանում իրավիճակը ժամ առ ժամ ավելի է բարդանում։ Վերջին տվյալներով ՝ Իսրայելի ավիահարվածների հետեւանքով զոհերի թիվը գերազանցել է 1000-ը, 6000 մարդ վիրավորվել է։ Սրան զուգահեռ Լիբանանի խորհրդարանի ներկայացուցիչ Հակոբ Բագրատունին Lurer.com-ի հետ զրույցում նշեց, որ ամբողջ Լիբանանում անորոշություն է տիրում։ Ընդհանուր առմամբ, Լիբանանում հավատարմագրված որեւէ դեսպանություն մինչ օրս իր քաղաքացիներին չի տարհանել. բոլոր երկրները, որպես կանոն, հորդորում են իրենց քաղաքացիներին լքել երկիրը։ Անդրադառնալով Լիբանանի հայկական համայնքում տիրող իրավիճակին, Բագրատունին նշեց․

«Հայաբնակ շրջաններում խաղաղ է, պատերազմ չկա։ Այն ընդհանուր իրավիճակը, որ Լիբանանում է տիրում, կիսում է նաեւ տեղի հայ բնակչությունը։ Զոհերի մեջ հայեր չկան» ,- մեզ հետ զրույցում նշեց Լիբանանի խորհրդարանի ներկայացուցիչ Հակոբ Բագրատունին, շեշտելով, որ անվտանգության նկատառումով տարհանում իրականացնելու անհրաժեշտություն ներկայում չի նկատվում։ 

« Եթե հայերն ուզում են Հայաստան գնալ, բնականաբար, մենք քաջալերում ենք այդ քայլը։ Մենք միշտ ենք ասել՝ եթե մեր հայրենակիցները եկել են այդ անդառնալի որոշմանն ու ուզում են լքել Լիբանանն, ապա մեզ համար միակ ուղղությունը Հայստանն ու հայրենիքը պիտի լինի » ,- շեշտեց Բագրատունին՝ չթաքցնելով, որ Հայաստանի իշխանությունների կողմից կանկալում են համարժեք արձագանքներ, համապատասխան քայլեր պիտի ձեռնարկեն, որպեսզի Լիբանանից մայր Հայաստան վերադարձած քաղաքացիներն իրենց ապահով զգան եւ շարունակեն իրենց բնականոն կյանքը։  

Բացի այդ, Լիբանանի խորհրդարանի ներկայացուցիչն ընդգշեց, որ Բեյրութում ՀՀ դեսպանությունը մշտական կապի մեջ է տեղի իշխանությունների, ինչպես նաեւ ըստ անհրաժեշտության համայնքային կառույցների հետ՝ ՀՀ քաղաքացիների խնդիրների՝ իր իրավասությունների շրջանակում պատշաճ հասցեագրման նպատակով։ 

Հիշեցնենք, որ անցած շաբաթվանից Իսրայելի օդուժը «Հզբոլլահի»՝ Լիբանանի տարբեր շրջաններում գտնվող օբյեկտների ուղղությամբ իրականացնում է զանգվածային հարվածներ։ Արձանագրվել են նաեւ մի քանի կետային ավիահարվածներ Բեյրութին, որոնց արդյունքում ոչնչացվել են «Հզբոլլահի» բարձրաստիճան հրամանատարներ: Այս գործողությունն Իսրայելն անվանել է «Հյուսիսի նետեր»։ Ըստ իսրայելական կողմի՝ նպատակն անվտանգ պայմանների ստեղծումն է՝ հրեական պետության հյուսիսային սահմանային շրջաններում, որպեսզի տասնյակ հազարավոր տեղահանված բնակիչները կարողանան վերադառնալ այնտեղ։ 

ՍԻԼՎԻ ՄՈՒՐԱԴՅԱՆ