ՆԳՆ-ն վերապատրաստում է ոստիկաններին՝ ուժային միջոցների կիրառման ստանդարտին ընդառաջ

Հայաստանում առաջին անգամ կներդրվի ոստիկանության կողմից ուժային միջոցների կիրառման հստակ ստանդարտ, որը կմուտք գործի 2025 թվականի նոյեմբերին։ «Արմենպրես»-ի հաղորդմամբ՝ Ներքին գործերի նախարարությունն արդեն սկսել է ծառայողների վերապատրաստման ծրագիրը՝ ապահովելու նրանց պատրաստվածությունը նոր չափանիշներին համապատասխան։

ՆԳՆ կրթահամալիրում մեկնարկել է «Ոստիկանության ծառայողի կողմից ֆիզիկական ուժի, հատուկ միջոցների և հրազենի գործադրումը» խորագրով եռօրյա դասընթացը։ Տեսական մասում ծառայողները ուսումնասիրել են «Ոստիկանության մասին» ՀՀ օրենքը և հատուկ միջոցների կիրառման վերաբերյալ միջազգային ու ազգային իրավական փաստաթղթերը։ Քննարկվել են նաև ծառայության ընթացքում ծագած խնդրահարույց իրավիճակներ՝ շեշտելով ուժի կիրառման սահմանները, պայմաններն ու իրավական հիմքերը։

«Ծառայողները թարմացնում են իրենց գիտելիքները և զարգացնում հմտությունները՝ հատուկ միջոցների, հրազենի և ֆիզիկական ուժի գործադրման հետ կապված իրավիճակներում առավել արդյունավետ գործելու համար»,- նշել է ՆԳՆ կրթահամալիրի ուսումնական կենտրոնի հատուկ պատրաստականության կրթաճյուղի պետ Արթուր Հակոբյանը։

Տեսական փուլն ավարտելուց հետո դասընթացները տեղափոխվել են Կոտայքի մարզ, որտեղ համայնքային և հատուկ նշանակության ստորաբաժանումների ծառայողները գործնականում ամրապնդում են ստացած գիտելիքները։ Նման դասընթացներ կանցկացվեն նաև Արմավիրի մարզում։

Սա պիլոտային ծրագիր է, որն ընդգրկում է բոլոր մարզերը։ Ծրագիրը նպատակ ունի ապահովել, որ համակարգի բոլոր ծառայողները լիովին պատրաստ լինեն ստանդարտի ներդրման պահին։