Ինչքան շատ եք Փաշինյանի անունը տալիս, այնքան մեր վարկանիշը բարձրանում է. Սիմոնյանը՝ Մինասյանին (տեսանյութ)

ԱԺ-ում Հայաստանի եւ Ադրբեջանի սահմանազատման հանձնաժողովների կանոնակարգը վավերացնելու մասին հարցի քննարկման ժամանակ «Հայաստան» խմբակցության քարտուղար Արծվիկ Մինասյանը դիմելով ԱԺ նախագահ Ալեն Սիմոնյանին՝ նշեց․ «Հենց նոր դուք  ստեցիք և կեղծեցիք՝ մեղադրելով ՀՅԴ-ին Արցախն Ադրբեջանի մաս ճանաչելու մասով, այն էլ ոչ ավել, ոչ պակաս, վարչատարածքային բաժանման մասին օրենքի վրա հղում անելովԱռաջարկում եմ՝ թողեք այդ վարքագիծը, մի ասեք, հատկապես այս ամբիոնից բաներ, որոնք իրականության հետ կապ չունեն»,- ասաց նա:

Ալեն Սիմոնյանն արձագանքեց. «Ստում եք դուք, որովհետեւ ձեր հետևը նստած ՀՅԴ-ն ներկայացնող պատգամավորը քվեարկել է վարչատարածքային բաժանման մասին օրենքին կողմ, որտեղ գրված է, որ սահմանից այն կողմ Ադրբեջանի Հանրապետությունն է»:

Ընդդիմադիր պատգամավորն ասաց. «Փաստորեն իմ հորդորը չանցավ, դուք շարունակում եք ստել ու կեղծել: Վարչատարածքային բաժանման մասին օրենքը բացարձակ կապ չունի Արցախի հարցի հետ, իրավաբանների հետ խորհրդակցեք: 

Երկրորդը, ձեր վարքագիծը բնութագրվում է որպես դավաճանական վարքագիծ՝ արդարացնել դիմացինի ազգանվեր գործունեությունը մանիպուլյացիայի ենթարկելով»:

ԱԺ նախագահը հորդորեց պիտակավորումներից հեռու մնալ. «Դավաճանությունը  բանակը, երկիրը թալանելն է, ընտրություններ կեղծելն է, դրա մեջ բուռն մասնակցություն ունենալը եւ այլն: Դուք այդ ամենին ոչ վաղ անցյալում տեղյակ եք եղել, չեմ ուզում ասել՝ մասնակից եք եղել:

Երբ ԼՂ սահմանադրության մեջ գրված է, որ այս-այս շրջանները ԼՂ-ի անբաժանելի մաս են, իսկ դուք այստեղ կոճակ եք սեղմում եւ ներպետական օրենքով սահմանում եք, որ դա ԼՂ չէ, դա Ադրբեջան է, ու հիմա գալիս եք զարմացած դեմքով ինձ ստի մեջ եք մեղադրում, դրա համար իրավաբան պետք չի լինել, դրա համար տառաճանաչ է պետք լինել եւ պարկեշտություն է պետք ունենալ, որ տեսնել, թե ինչ եք արել:

Նիկոլ Փաշինյանի անունն էլ մի քիչ քիչ տվեք, ինչքան շատ եք տալիս, այնքան Նիկոլ Փաշինյանի եւ մեր վարկանիշը բարձրանում է»,- նշեց ԱԺ նախագահը: