Վարդաձորում ոռոգման համակարգ և ջրանցք է կառուցվում
Գեղարքունիքի մարզի Մարտունի համայնքի Վարդաձոր գյուղում ՀՀ կառավարության կողմից 2024 թվականին իրականացվող սուբվենցիոն ծրագրերի շրջանակներում այս տարվա օգոստոսից սկսվել և ընթանում են ոռոգման համակարգի և Ձորագյուղ-Վարդաձոր ջրանցքի կառուցման աշխատանքները։
Ինչպես տեղեկացում է Մարտունու համայնքապետարանի աշխատակազը, Վարդաձորի ոռոգման համակարգի և Ձորագյուղ-Վարդաձոր ոռոգման ջրանցքի կառուցման ծրագրի պայմանագրային արժեքը կազմում է 140 միլիոն 295 հազար 862 դրամ, որի 75 տոկոսը հատկացնում է ՀՀ կառավարությունը, 25 տոկոսը՝ Մարտունու համայնքապետարանը։
Ծրագրով նախատեսված է ոռոգման համակարգի կառուցում 10, 14, 16, 26, 27, 35, 41 –րդ և Ալաշկերտի փողոցներում ու մայր առվի վրա՝ 6010 մետր ընդհանուր երկարությամբ։ 1700 մետր երկարությամբ էլ կառուցվում է Ձորագյուղ-Վարդաձոր ոռոգման ջրանցքը։
Ոռոգման համակարգի շինարարական աշխատանքները մեկնարկել են 2024 թվականի սեպտեմբերից և հոկտեմբերի 22-ի դրությամբ իրականացվել շուրջ 30 տոկոսով։ Ձորագյուղ-Վարդաձոր ոռոգման ջրանցքի շինարարական աշխատանքները մեկնարկել են 2024 թվականի օգոստոսից և արդեն մոտենում են ավարտին։
Շինարարական աշխատանքներն իրականացնում է «Շին Կոմպլեքս» ՍՊԸ-ն։
Ծրագրի շահառու են հանդիսանում Վարդաձոր գյուղի բոլոր տնտեսությունները, որոնց եկող տարվանից ոռոգման ջուրը կմատակարարվի ժամանակին և անկորուստ։