Մեծ Բրիտանիան կմեծացնի ներգրավվածությունը Մերձավոր Արևելքում

Մեծ Բրիտանիան կմեծացնի ներգրավվածությունը Մերձավոր Արևելքում, քանի որ տարածաշրջանում կայունությունը հիմնարար է Մեծ Բրիտանիայի անվտանգության համար: 

Ինչպես հաղորդում է «ՏԱՍՍ»-ը, այս մասին Սաուդյան Արաբիա կատարած այցի ժամանակ ասել է Մեծ Բրիտանիայի վարչապետ Քիր Սթարմերը։

«Մենք ամրապնդում ենք մեր պաշտպանական համագործակցությունը Սաուդյան Արաբիայի հետ, պաշտպանում ենք Սիրիայում ամենախոցելի մարդկանց, աջակցում ենք Լիբանանի մեր գործընկերներին և աշխատում միջազգային հանրության հետ Իսրայելում և Գազայի հատվածում հրադադարի հասնելու, բոլոր պատանդների վերադարձն ապահովելու և արագացնելու համար»,- ասվում է բրիտանական կառավարության ղեկավարի հայտարարության մեջ, որը տարածել է նրա գրասենյակը։

«Փոփոխությունների իմ ծրագիրը կյանքի կոչելու համար մեզ անհրաժեշտ է անվտանգության ամուր հիմք, բայց դա հնարավոր չէ անել միայն տանը, դա մեզանից պահանջում է մեր դերը խաղալ գլոբալ բեմում՝ պահպանելով կայունությունը և պաշտպանելով գործընկերներին սպառնալիքներից, ինչպես հիմա, այնպես էլ ապագայում»,- հավելել է Սթարմերը:

Այցի ընթացքում նա հայտարարել է հավելյալ 11 միլիոն ֆունտ ստերլինգ (14 միլիոն դոլար)՝ Սիրիայի ամենախոցելի մարդկանց մարդասիրական օգնություն տրամադրելու համար: Այդ միջոցները կփոխանցվեն ՄԱԿ-ին և հասարակական կազմակերպություններին։ Դրանք ուղղված են լինելու, մասնավորապես, աջակցելու 370 հազար մարդու, որոնք, ըստ հաշվարկների, լքել են իրենց տները Սիրիայում վերջին իրադարձությունների հետևանքով։

Սիրիայի հակակառավարական ուժերը դեկտեմբերի 8-ին առանց դիմադրության հանդիպելու գրավել են Դամասկոսը։ ՌԴ արտգործնախարարությունը հայտնել է, որ Սիրիայի նախագահ Բաշար ալ-Ասադը սիրիական հակամարտության մի շարք մասնակիցների հետ բանակցություններից հետո որոշել է հրաժարական տալ և լքել Սիրիան՝ հրահանգելով խաղաղ ճանապարհով փոխանցել իշխանությունը։