Պատերազմի հանգամանքներն ուսումնասիրող քննիչ հանձնաժողովի եզրակացությունը պետք է հրապարակվի. ԱԺ-ում լսումները կանցկացվեն փակ

«Փաստինֆո»-ն գրում է․

Անհետ կորած զինծառայողների հարազատները պնդում են` պատերազմի հանգամանքներն ուսումնասիրող քննիչ հանձնաժողովի եզրակացությունը պետք է հրապարակվի, սակայն ԱԺ-ում նախատեսված փակ հանդիպումից մեծ ակնկալիքներ չունեն, դեռևս սպասում են հանդիպմանը: Անհետ կորած զինծառայողի հարազատ Արսեն Ղուկասյանը «Փաստինֆո»-ի հետ զրույցում հայտնեց, որ լսումներն անցկացվելու են փակ, սակայն օրվա և ժամի հետ կապված տեղեկություն դեռևս չկա:

Ինչ վերաբերում է ակնկալիքներին, ապա Ղուկասյանը նշեց, որ մեծ սպասելիքներ չունի, դեռ հարցական է` հանդիպումը կլինի, թե ոչ:

«Այնպես չէ` ասել են` հորս արև, կլինի: Չի լինի, որ իրենց ասածները հալած յուղի տեղ ընդունենք, որովհետև մեզ շատ են խաբել: Այնպես որ` կսպասենք հանդիպմանը, հանդիպման ավարտից հետո պարզ կլինի` գոհ ենք, թե` ոչ և այլն»,- ասաց Ղուկասյանը:

Մեր զրուցակիցը պնդեց` հանձնաժողովի եզրակացությունը պետք է հրապարակվի, հակառակ դեպքում` ինչ արժեք ունի այդ հանձնաժողովի կատարած աշխատանքը, ում համար են պարզում, ինչու են պարզում, թե ովքեր են մեղավորները` իրենց համար, թե հասարակության. «Հասարակությունը պետք է իմանա, թե ովքեր են դավաճանները»: Ղուկասյանը նկատեց` հանգամանքները քննվում են գաղտնիության ռեժիմով, թեև Արցախն արդեն Ադրբեջանի կազմում է, ականապատ դաշտերի քարտեզները տրվել են, հետևաբար ինչն է գաղտնի, թե որ տանկը որտեղ է եղել: Իսկ թե ինչու են գաղտնի պահում, ինչ մտավախություններ ունեն` Ղուկասյանը նշեց` դեռ պետք է հավաքվեն, չգիտի, օրենքին են հղում կատարում, որ գաղտնիության ռեժիմ պետք է պահվի, բայց դա ճիշտ չէ, այդ օրենքը, ըստ Ղուկասյանի, պետք է վերանայվի:

«Եթե տարածքն էլ քոնը չէ, տվել ես, էլ ինչ պետք է գաղտնի պահվի, տարածքում ինչ կա չկա` արդեն պարզ է, տարածքն արդեն Ադրբեջանին է պատկանում, թե ինչն են գաղտնի պահում` պարզ չէ, իսկ հանձնաժողովների նպատակը հանրությանը տեղեկացնելն է, թաքո ՞ւն են պահում, եթե պետք է չասեն, թե ովքեր են դավաճանները, այդ դեպքում ինչ իմաստ ուներ, ով պետք է իմանա, ինչպես պետք է պատժեն»,- նշեց Ղուկասյանը:

Հիշեցնենք, որ դեկտեմբերի 27-ին անհետ կորած զինծառայողների հարազատները ժամեր շարունակ փակել են Բաղրամյանի պողոտան՝ հանդիպում պահանջելով 44-օրյա պատերազմի հանգամանքներն ուսումնասիրող քննիչ հանձնաժողովի նախագահ Անդրանիկ Քոչարյանի հետ և պահանջելով, որ վերջինս հրապարակի հանձնաժողովի եզրակացությունը։ Անդրանիկ Քոչարյանը հրաժարվել էր ընդունել բոլոր հարազանտներին՝ առաջարկելով, որ չորս հոգի գնա հանդիպման, ինչն էլ անընդունելի էր անհետ կորածների հարազատների համար։ Նրանք շարունակեցին մնալ փողոցում, ավելի ուշ նրանց մոտեցավ Ալեն Սիմոնյանը։ Վերջինս պայմանավորվել է հարազատների հետ՝ կազմակերպելու հանդիպում՝ Անդրանիկ Քոչարյանի հետ։

Դեկտեմբերի 28-ին ԱԺ-ում Անդրանիկ Քոչարյանի հետ հանդիպում է եղել, որը տևել է շուրջւ երկու ժամ, պայմանավորվածություն է ձեռք բերվել` խորհրդարանական լսումներ անցկացնելու:

Ի. Ս.

Աղբյուր` Փաստինֆո