Վարչապետը կարող էր կանչել ինձ, ասեր՝ պարոն Աղազարյան, մեծ մարդ ես, անհարմար է, էլ տենց բաներ չանես. Հովիկ Աղազարյան

«Մենք դիմել ենք դատախազություն՝ պարզելու, թե ինչպես է եղել, որ իմ հեռախոսի պարունակությունը հայտնվել է երրորդ անձանց մոտ։ Ընդ որում, մենք գիտենք, որ ոչ միայն պարոն վարչապետի, այլև այլ անձանց մոտ է հայտնվել։ Էլ չասեմ, որ հանրայնացում է տեղի ունեցել՝ ՔՊ վարչության և խմբակցության մակարդակով»,- «Փաստինֆոյի» հետ զրույցում ասել է ՔՊ-ից հեռացված, արդեն անկախ պատգամավոր Հովիկ Աղազարյանը։

«Դատախազությունը դիմել է Հակակոռուպցիոն կոմիտե, այնտեղից մերժել էին վարույթ հարուցելու գործընթացը։ Այնուհետև, դիմել ենք հսկող դատախազին, նրանք նույնպես պատասխանել էին, որ հիմքեր չեն տեսնում։ Հիմա դիմել ենք դատարան, որպեսզի դատարանը պարտադրի պատկան մարմիններին՝ վարույթ հարուցելու անձնական տվյալների հանրայնացման հարցով»։

Աղազարյանի արձանագրմամբ՝ Արգիշտի Քյարամյանի և իր մասնակցության միջադեպի շրջանակներում է իր հեռախոսն առգրավվել, սակայն, ըստ դատարանի որոշման, հեռախոսի պարունակությանը կարող էր ծանոթանալ միայն վարույթն իրականացնող մարմինը։ «Դատարանը ասել է, որ դուք՝ սիրելի քննիչ կամ ձեր վերադասը, կարող եք ծանոթանալ, բայց ոչ փոխանցելու այն վարչապետի կամ այլ անձանց։ Ինձ՝ որպես քաղաքացի, հետաքրքիր չի, թե որոշ մարդիկ կամ վարչապետը ոնց են ձեռք բերել որևէ տեղեկություն, որն իր մեջ պարունակում է պետությանը սպառնացող տեղեկատվություն կամ նկար։ ինձ սա չի հետաքրքրում, ոնց կարող են թող ձեռք բերեն, դա վերաբերում է պետությանը, ես այստեղ օքեյ եմ, բայց մյուս բաները ... անմարդկային»,- ասել է Աղազարյանը։

Հարցին, թե վիրավորված չէ՞ իր նախկին թիմից՝ իր նկատմամբ վերաբերմունքի համար՝ նա պատասխանեց, որ հպարտ է, որ եղել է այդ թիմում, որովհետև այդ թիմի մեծամասնությունը իրեն կոռեկտ է պահել։ «Մեծամասնությունն իրեն թույլ չի տվել այդքան իջնել ու կարդալ անձնական տվյալներ պարունակող նամակագրությունները, ուղղակի իրենք այն «պավլիկմարոզովներին» են լսել, ովքեր իրենց թույլ են տվել կարդալ դրանք։ Հետևաբար, ես հպարտ եմ, որ եղել եմ էդպիսի քաղաքացիների կողքին, ինչ վերաբերում է վարչապետին՝ պարոն վարչապետը կարող էր տեղեկանալ, բայց ոչ հրապարակել, կարող էր կանչել ինձ, ասեր՝ պարոն Աղազարյան, մեծ մարդ ես, անհարմար է, էլ տնց բաներ չանես, բայց էլի տարանջատենք՝ պետական գաղտնիք ու նեղ անձնական տիրույթը։ Ես իմ ամենասարսափելի երազներում նման բան չէի պատկերացնի, իմ կարդացած գրքերում տենց բան չկա, իմ լսած պատմություններում՝ ստալինյան 37 թվի հետ կապված, էդպիսի բանի չեմ հանդիպել, դա անթույլատրելի էր»,-ասաց Աղազարյանը։