Փաշինյանը Վաշինգտոնում հանդիպել է նաև «Կյանքի խոսքի» ղեկավար Արթուր Սիմոնյանի հետ

Երեկ ուշ գիշերին վարչապետ Փաշինյանի վաշինգտոնյան հանդիպումներից տարածված կադրերը նորից բուռն քննարկումների տեղի տվեցին։ Ամենատպավորիչ կադրը թերևս Հայաստանի աղանդավորական խոշոր կառույցներից մեկի՝ «Կյանքի խոսքի» ղեկավար Արթուր Սիմոնյանի հետ Փաշինյանի ջերմագին ողջագուրումն էր, ինչը մի կողմից լրիվ հասկանալի էր, քանի որ նրանց երկուսի հանդիպման շարժառիթը հենց ԱՄՆ-ում անցկացվող կրոնական ազատությունների գագաթաժողովն էր, մյուս կողմից՝  «Save Armenia»-ի կազմակերպած ընդունելությանը աղանդավորական թեւի ղեկավարի հետ ջերմ հանդիպումը հուշում է, որ Փաշինյանն այսօր էլ՝ ինչպես 2018-ի հեղափոխության օրերին, հենվում է աղանդավորական խմբերի ռեսուրսների վրա։

Եվ չի բացառվում, որ Փաշինյանի այցն ԱՄՆ բոյկոտած հայ համայնքի փոխարեն այս անգամ Վաշինգտոնում ֆոն էին ապահովել Արթուր Սիմոնյանի խմբակի անձինք։ Նկատենք, տարիներ առաջ Արթուր Սիմոնյանը ԱՄՆ-ում բնակություն հաստատելուց հետո «Կյանքի խոսքի» մասնաճյուղ էր բացել այնտեղ, ինչի մասին գրեց մամուլը։

Հիշենք, ԱԳ նախկին նախարար Վարդան Օսկանյանը Փաշինյանի գործուղումից առաջ կոչ էր արել ամերիկաբնակ մեր հայրենակիցներին բոյկոտել և թույլ չտալ նրան իրենց միջոցով լեգիտիմացնել հակապետական նոր եզրույթներ։

Եվ ահա երեկ կադրեր տարածվեցին ԱՄՆ-ից, որ վատ ու անպատվաբեր գրառումներով  ցուցանակներ պարզած  մեծաթիվ հայեր իսկապես արշավել են ու իրենց ակցիայով ապացուցեցին, որ Փաշինյայան անընդունելի է ամերիկահայերի համար և իրենք թույլ չեն տա,  իրենց հետ ֆորմալ հանդիպումներով արդարացնել ու լեգալացնել Ցեղասպանության միջազգային ճանաչմանն ընդդիմացող ՀՀ կառավարության նոր որդեգրած մոտեցումներ։