Ոչ թե միտումնավոր ենք խաբել, այլ կյանքն է այդպես թելադրում. ՔՊ-ականը՝ խոստումները չկատարելու մասին

Տրանսպորտի խնդիրը, ինձ թվում է, մոտ ապագայում կլուծվի, այսինքն՝ տրանսպորտային պարկը լրիվ կհամալրվի,  NEWS.am-ի հետ զրույցում նշել է ՔՊ-ական պատգամավոր Գագիկ Մելքոնյանը՝ անդրադառնալով նրան, որ թեեւ տրանսպորտը թանկացել է, բայց խցանումը չի վերացել, մարդիկ էլի խցկված են երթեւեկում:

«Ինչ վերաբերում է խցանումներին, հիմա տեսեք ահագին պողոտաներ կան, որ ավտոբուսների գիծը առանձնացրել են, որ ավտոբուսները գոնե կարողանան անխոչընդոտ երթևեկել։ Կամաց-կամաց գնալու են դրան, որ սեփական ավտո ունեցողը ձգտի դեպի ավտոբուսը, որովհետև ավտոբուսով ինքը ավելի շուտ կհասնի գործի, քան՝ խցանումների մեջ մնալով»,-ասել է նա:

Դիտարկմանը, որ Երեւանի ընտրությունների ժամանակ ՔՊ-ի թեկնածուն չէր ասում, որ գալու են թանկացնեն ամեն բան, պատգամավորը պատասխանել է. «Դա ոչ թե միտումնավոր խաբել են, այլ կյանքն է այդպես թելադրում: Եթե ուզում ես լավ ավտոբուս նստել, ուրեմն պիտի թանկ վճարես, եթե ուզում ես «Գազել» նստել, 100 դրամը կտաս, կնստես: Հիմա ո՞րն է լավ: «Գազել» նստում էին, ոնց որ շախմատի ձի դառնար մարդը, կզած էին գնում: Այո, դեռ ավտոբուսների քանակը չի բավարարում: Բազմիցս քաղաքային ղեկավարությունը ասել է, որ այսքան քանակի տրանսպորտի դեպքում նոր մենք կարող ենք լիարժեք ապահովել ժամային գրաֆիկը և մնացած ամեն ինչը։ Դեռ ահագին ճանապարհ կա, որ անցնենք»: