Ատելության հրահրման հիմքով քրեական հետապնդման իրականացումն անձի նկատմամբ մտահոգիչ է․ ՄԻՊ

Ատելության հրահրման հիմքով քրեական հետապնդման իրականացումն անձի նկատմամբ իմ կողմից դիտարկվել է  որպես մտահոգիչ։ Այս մասին լրագրողների հետ զրույցում ասել է ՀՀ ՄԻՊ Անահիտ Մանասյանը՝ անդրադառնալով Հանրապետության հրապարակում մի խումբ օտարերկրացիների մասնակցությամբ տեսանյութ տարածած Ղարիբ Բաբայանի ձերբակալությանը։

«Խոսքը կարող է ընկալվել որպես ատելություն, ատելության խոսք, բայց քրեաիրավական պատասխանատվություն նման խոսքի համար բացառիկ դեպքերում պետք է կիրառելի լինի, դրա համար եմ մտահոգիչ համարել։ Սակայն, որևէ մեկի կողմից չի կարող արդարացվել վիրավորանքի, ատելության խոսքի տարածումը՝ թե՛ իմ, թե՛ ձեր կողմից»,– ասել է Մարդու իրավունքների պաշտպանը։

Նա նշել է, որ ինքը չի կարող իրավասու մարմիններին պարտադրել անվտանգության հարցերով իրականացնել քննություն, մինչև այն պահը, երբ գործ ունենք մարդու իրավունքների հետ։