Հարկային ամբողջ ծանրությունը դնում են մանրածախի վրա. տնտեսվարողները բողոքի ակցիա են անում կառավարության մոտ

Տնտեսվարողները Կառավարության շենքի մոտ շարունակում են բողոքի ակցիան։  Սուրմալու տոնավաճառի տնտեսվարողներից տիկին Իրինան լրագրողների հետ զրույցում մանրամասներ ներկայացրեց ԱԺ տնտեսական հանձնաժողովի անդամների հետ հանդիպումից՝ նշելով, որ ամբողջ նոր հարկային  ծանրությունը դնում են մանրածախի վրա, իրենք էլ առաջարկել են սկսել խոշորից։

Նրա խոսքով՝ իրենց համոզել են չընդդիմանալ, քանի որ սանդղակով իրենց ծախսերն ավելի են պակասելու․ «տեղի, նույնիսկ լույսի վճարները նրանց վրայից հանվում են»։

«Մենք եռամսյակի զեկույցի համար պետք է հաշվապահ պահենք, իսկ դրանով հաշվապահի ծախսերն անգամ չի փակվում»,-նշեց տնտեսվարողը։

Նա նաև նշեց, որ հանդես են եկել առաջարկով. «Ասացինք՝ ինչո՞ւ եք սկսում մանրածախից, այդ ծանրությունը ինչո՞ւ եք դնում մանրածախի վրա։ Եկեք սկսեք մեծածախից, խոշորից, եթե այդքան գեղեցիկ ձևով ներկայացնում եք,  շատ լավ է, թող խոշորն իր ծախսերը հանի, իրենք գրագետ հաշվապահներ ունեն, ավելի հեշտ այդ անցումը կկատարեն»։

Տնտեսվարողներից մեկ ուրիշն էլ նշեց, որ ԱԺ-ում տնտեսական հանձնաժողովի ներկայացուցիչների հետ հանդիպումից հետո ՔՊ–ական պատգամավոր Թունյանը հայտարարել է, որ օրենքը փոփոխելու հավանականությունը զրո է։

 «Բայց հիմա մեր գործողությունները պետք է հասնեն նրան, որ ընդհանրապես օրենքը հետ քաշեն։ Ոչ մի օգուտ չտվեց, բայց օգուտ կլինի մեր մեծ խմբով հավաքվելու դեպքում»,– ասաց նա։