ԱՄՆ-ն կարող է միայն երազել Իրանին ծնկի բերելու մասին․ Փեզեշքիան
Իրան
ԱՄՆ առաջնորդ Դոնալդ Թրամփը խոսում է Իրանի հետ բանակցություններ սկսելու իր ցանկության մասին, սակայն այդ ընթացքում նոր ինտրիգներ է ծրագրում նրա դեմ։ Այս մասին հայտարարել է Իսլամական Հանրապետության նախագահ Մասուդ Փեզեշքիանը, գրում է ՏԱՍՍ-ը։
«Թրամփն անընդհատ ասում է, որ պատրաստ է բանակցել Իրանի հետ: Միևնույն ժամանակ նա ավելի ու ավելի շատ հրամանագրեր է ստորագրում հակաիրանական միտումներով: ԱՄՆ-ը կարող է միայն երազել Իրանին ծնկի բերելու մասին»,- ասել է Փեզեշքիանը Իսլամական հեղափոխության հաղթանակի 46-րդ տարեդարձին նվիրված տոնակատարությունների ժամանակ: Ուղիղ հեռարձակումը վարում էր IRIB հեռուստաալիքը։
Իրանի նախագահի խոսքով՝ Իսլամական Հանրապետությունը ժողովրդի օգնությամբ կկարողանա կանխել ոչ բարեկամ երկրների կողմից ծրագրված բոլոր դավադրությունների իրականացումը։
«Թշնամին փորձում է պառակտում առաջացնել իրանական հասարակության մեջ՝ հավատալով, որ դա կօգնի իրեն կյանքի կոչել իր ծրագրերը: Աստծո հանդեպ հավատով և միասնությամբ մենք դուրս կգանք ճգնաժամից»,- հավելել է նա:
