2024-ին մեկ ուղևորության ինքնարժեքը ներկայացրել եք 213 դրամ, հիմա ասում եք՝ 313 դրամ. սա ի՞նչ շիլաշփոթ է. Մանուկ Սուքիասյան

Հայտարարվել է, որ նոյեմբերից վարորդները կանխիկի հետ գործ չունեն. հիմա որ ասեմ՝ սուտ է, ասելու եք՝ յա, նոյեմբերին «Հայգեր»-ները շարունակել են սպասարկել վարորդների կողմից 100 դրամ ընդունելով, այսինքն  մետաղադրամ ընդունող սարքերին զուգահեռ շարունակել են կանխիկ դրամ ընդունել։ Այս մասին Երեւանի ավագանու նիստում հայտարարեց «Մայր Հայաստան» խմբակցության ղեկավար Մանուկ Սուքիասյանը:

«Դուք ասում եք՝ կանխատեսելի թիվ է եղել ամսական 550 հազար ուղեւորափոխադրումը, իսկ այսօր եկել ասում եք՝ հունվարին «Երեւան ավտոբուսը» փոխադրել է 231 000 ուղեւոր, նշանակում է ձեր կանխատեսված թիվ ու իրականությունը կիլոմետրով հեռու են իրարից: Դուք ինքներդ ձեր հաշվարկը կասկածի տակ եք դնում:

Ինչ վերաբերում է ինքնարժեքներին, 2023 թվականի ինքնարժեքը ներկայացրել եք 265 դրամ, 2024-ին՝ 213 դրամ, հետո դարձավ 210-230, հիմա ասում եք 313 դրամ:

Եթե այս ամենին գումարում եք նաև 2019 թվականին կայքում հրապարակված ինֆորմացիան, որ 470 հազար է եղել ուղևորափոխադրումների թիվը, չհաշված մասնավորը։ Հիմա հունվարի 1-ից մասնավորն էլ է եկել, այսինքն օբյեկտիվորեն ուղևորափոխադրումների թիվը պիտի աճեր, 2023 թվականին Արցախի անկումից հետո բնակչության թիվը մեծացավ, հազարավոր շինթույլտվությունների արդյունքում Երևանի բնակչության թիվը ավելացավ, բայց ձեր թվերով տրանսպորտից օգտվողների թիվը ստանում եք 231 հազար:

Հիմա հարցս հետևյալն է, այս թվաբանական շիլաշփոթը արժանահավա՞տ է երևանցու համար, ո՞նց կարելի է նման էքսպերիմենտներով գնալ առաջ»,-ասաց Սուքիասյանը:

Ի պատասխան՝ Տիգրան Ավինյանն ասաց, որ շիլաշփոթ՝ որպես այդպիսին, չկա և երբևէ չի եղել։ «Եղել է ստվեր և այդ ստվերի մասին բոլորս խոսել ենք: Նոյեմբեր ամսվանից այդ ստվերը սկսել է ճշգրտվել։ Հիմա երբ որ ստվերը սկսել է ճշգրտվել, համապատասխան ստվերի վերաբերյալ ենթադրությունները վերածվել են իրական թվերի»,– արձագանքեց նա։