ՔՊ–ն դեմ է քվեարկելու մեկ ուղևորության համար 100 դրամ վճարելու նախագծին․ Արմեն Գալջյան

Երևանի ավագանու «Քաղաքացիական պայմանագիր» խմբակցության ղեկավար Արմեն Գալջյանը հայտնեց, որ ՔՊ–ն դեմ է քվեարկելու «Ազգային առաջընթաց» խմբակցության ներկայացրած նախագծին։

Հիշեցնենք, որ Երևանի ավագանու նիստում «Ազգային առաջընթաց» խմբակցության անդամ Արամ Թորոսյանը ներկայացրեց 80 000 երևանցիների պահանջը՝ մեկ ուղևորության համար 100 դրամ վճարել։ 

«Մի խմբակցությունն ասում է ինքնարժեքը 65 դրամ է, մյուս ընդդիմադիր խմբակցությունը նախագիծ է բերում, որ 100 դրամ է։ Իրենք իրենց հակասում են։ Մենք ասում ենք, որ ինքնարժեքը 203 դրամ է, սահմանում ենք սակագին 150 դրամ, մնացածը սուբսիդավորում ենք։ Իրենք ասում են ինքնարժեքը 65 դրամ է, ու ինքնարժեքից թանկ սակագին են բերում։ Դրանից հետո որևէ քննարկում անիմաստ է։

Անդրադառնալով տրանսպորտի թանկացման դեմ կազմակերպված ստորագրահավաքին՝ նա նշեց, որ ցանկացած քաղաքացի, եթե լսում է, որ ինչ–որ բանի գինը թանկանում է, բնականաբար, դեմ է քվեարկելու։ «Ստորագրություններ հավաքելը շատ հեշտ բան է։ Ունենք տվյալներ, որ ավելի քան 80 հազար մարդ ամեն օր օգտվում է այս համակարգից»,– նշեց նա։

Գալջյանի խոսքով՝ տրանսպորտի գնի թանկացումը կապված է տրանսպորտային միջոցների փոփոխության հետ։