0038 գաղտնի հրամանից բխող գործողություններ Յուրի Խաչատուրովին չի մեղսագրվում․ փաստաբան Միհրան Պողոսյան

Մեղադրանքում նկարագրված փաստական հանգամանքները մեծ մասով իրականությանը չեն համապատասխանում։ Տեղի ունեցածի մասով ՀՔԾ-ն տվել է ուրույն մեկնաբանություն, որը կախված է քաղաքական իշխանության նախասիրություններով։ Այս մասին այսօր «Մարտի 1»-ի գործով դատավարությունից հետո լրագրողների հետ զրույցում ասաց փաստաբան Միհրան Պողոսյանը։ 

«Եթե արձանագրենք 2018 թվականի փետրվարին ԱԺ-ում Մարտի 1-ի դեպքերին վերաբերող լսումները այդ ժամանակ այսօրվա քաղաքական իշխանության բարձրագույն պաշտոններ զբաղեցնող անձինք հայտնում էին այն դիրքորոշումները այդ իրադարձությունների վերաբերյալ, ինչը հետագայում արտացոլվել է քրեական գործում։ Խնդիրը փաստերի մեկնաբանման մեջ է։ Կան իրադարձություններ, որոնք իրականությանը չեն համապատասխանում, բայց ամենամեծ խնդիրը դրանց տրված մեկնաբանություն է, որը սուբյեկտիվ է, դա քաղաքական իշխանությամբ պայմանավորված է։ Յուրի Խաչատուրովին 0038 գաղտնի հրամանից բխող քայլ չի մեղսագրվում, եթե բան չաներ, դրա համար կդատեին»,- նշեց փաստաբանը։