Մենք չենք կարող ամբողջությամբ իրենց ուզածն անել․ Արմեն Փամբուխչյանը՝ «Հաղթանակ» թաղամասի բնակիչների պահանջների մասին

Երևանի փոխքաղաքապետ Արմեն Փամբուխչյանը լրագրողների հետ զրույցում հայտնեց, որ վաղը պատրաստվում է ընդունել Հաղթանակ թաղամասի բնակիչներին:

«Այն պնդումը, որ ոչ մի գործ առաջ չի գնում, չի համապատասխանում իրականությանը, քանի որ արդեն իսկ 96 գործ արված է վերջին երկու տարվա ընթացքում Հաղթանակ թաղամասի հետ կապված: Ունենք էլի դիմումներ, որոնք ընթացքի մեջ են: Այնտեղ մի կարևորագույն խնդիր կա գերեզմանատան հետ կապված:

Այս ամբողջից առաջ փակ գերեզման էինք համարում, քաղաքապետ որոշումով փակել էինք գերեզմանատունը, սակայն մարդ էր մահացել, իրենց խնդրանքով մենք համարեցինք բաց գերեզման: Իրականում այնտեղ տեղեր կան։ Բաց գերեզման է, բայց այնտեղ կա սանիտարական գոտի, որ 300 մետր շառավղով չպետք է լինեն որևէ բնակելի և այլ տարածքներ։

Մենք չենք կարող ամբողջությամբ և՛ իրենց ուզածն անել, և՛ պահպանել սանիտարական գոտին, և՛ մնացած կանոնները: Իրենք պետք է որոշում կայացնեն՝ կամ ունենում են սանիտարական գոտի, փակ գերեզման է համարվում, որտեղ այլևս որևէ հուղարկավորություն չի իրականացվում, կամ բաց է մնում գերեզմանատունը, բայց 300 մետր շառավղով բազմաթիվ հողեր և բնակելի տներ խնդիր են առաջացնելու:

Կամ մենք առաջարկել ենք երրորդ տարբերակը, որը ենթադրում է, որ պետք է կառավարության որոշումով լինի: Մենք ասել ենք, որ նաև այդ պրոցեսին ենք պատրաստ, համարենք կիսաբաց ռեժիմ։ Դա ենթադրում է, որ այնտեղ կարելի է իրականացնել հուղարկավորություն, եթե ընտանիքի անդամ է մահանում և իրենք ունեն գերեզմանատուն, բայց նոր հուղարկավորություններ չեն կարող իրականացնել:

Հիմա բնակիչները պետք է ընտրություն կատարեն, որովհետև այդ սանիտարական գոտին կարևոր հատված է առողջապահական և բնապահպանական տեսանկյունից»,-  ասաց Ա. Փամբուխչյանը: