Կիսաբոյկոտ է հիմա, մարդիկ առիթից օգտվում ու չեն վճարում․ Սուրեն Գրիգորյան

2013 թվականին, հիշում եմ, մարդիկ անձնական մեքենաներով էին իրար տեղափոխում, հանրային տրանսպորտից չէին օգտվում, բոյկոտում էին օգտվելը։ Իսկ հիմա օգտվում են, բայց կիսաբոյկոտ ա էլի։ Այս մասին  Երևանի ավագանու նիստի ընդմիջմանը լրագրողների հետ ճեպազրույցում ասաց փոխքաղաքապետ Սուրեն Գրիգորյանը։

«Ես տեսնում եմ մարդկանց, ովքեր, առիթից օգտվելով, փորձում են քիչ վճարել կամ չվճարել, այլ ոչ թե քաղաքական դիրքորոշում հայտնողների։ Վարորդներին հորդորում ենք լինել համբերատար, սադրանքների չտրվել, որևէ մեկին չվիրավորել, բայց պատկերացնենք, որ այդ մարդիկ էլ երկաթից չեն, տարբեր իրավիճակներում կարող են նյարդերը տեղի տալ»,– ասաց նա։

Պատասխանելով լրագրողների հարցին, թե արդյո՞ք քաղաքային իշխանությունը ստորագրահավաքի արդյունքների հիման վրա կգնար զիջումների, եթե պահանջն ավելի հստակ ձևակերպված լիներ, Գրիգորյանն ասաց․ «Նման թեմայով ստորագրահավաք իրականցնելը քաղաքական անպատասխանատվության հերթական դրսևորումն է, որովեհտև ես վստահ եմ, որ երբ ցանկացած հասարակությունում հարց է տրվում՝ կող՞մ եք, որ ինչ–որ բան թանկանա, թե դեմ եք, մարդիկ միշտ կողմ են նրան, որ չթանկանա»։