Հայոց ցեղասպանության թանգարանում իրականացվել են հրդեհաշիջման վարժանքներ

Հայոց ցեղասպանության թանգարանում ՀՀ ՆԳ նախարարության փրկարար ծառայության Երևան քաղաքի փրկարարական վարչության թիվ 1 հրշեջ-փրկարարական ջոկատն անցկացրեց վարժանք՝ «Հրդեհաշիջման աշխատանքների կազմակերպումը և իրականացումը Հայոց ցեղասպանության թանգարանում» թեմայով: 

«Արմենպրես»-ի հետ զրույցում Հայոց ցեղասպանության թանգարանի տնօրեն Էդիտա Գզոյանը նշել է, որ թանգարանի ընտրությունը պատահական չէ, քանի որ տվյալ հաստատությունն ունի ռազմավարական նշանակություն։

 «Մեզ նախապես տեղեկացրել էին միջոցառման մասին։ Այն կարևոր է մեզ համար՝ չնայած մեր անձնակազմը պարբերաբար ունենում է մարզումներ ու վերապատրաստումներ։ Այդուհանդերձ, հավելյալ պատրաստումը չի խանգարի։ Միջոցառումն առաջին անգամ չէ, որ կազմակերպվում է մեզ մոտ։ Անցյալ տարի վարժանքներն անցկացվեցին վարչական մասում, իսկ այս անգամ կազմակերպվեց հենց թանգարանում։ Հաշվի առնելով, որ մշտապես ունենք զբոսաշրջիկների մեծ հոսք, պետք է պատրաստ լինենք, որ բոլոր արտակարգ պատահարների դեպքում կարողանանք արագ և ճիշտ արձագանքել։ Մեր շենքում, բնականաբար, ունենք հրշեջ միջոցներ, տարբեր տեղերում տեղակայված կրակմարիչներ, կան տարհանման սխեմաներ բոլոր սենյակներում։ Մեր հսկիչները պատրաստ են գործել այդ սխեմաների համաձայն։ Մեզ մոտ գործում է նաև հակահրդեհային համակարգ»,- տեղեկացրել է Գզոյանը։  

ՀՀ ՆԳՆ փրկարար ծառայության Երևանի փրկարարական վարչության հրդեհաշիջման և փրկարարական աշխատանքների կազմակերպման բաժնի պետ, փոխգնդապետ Գարեգին Հակոբյանն «Արմենպրես»-ին հայտնել է, որ հատուկ տակտիկական վարժանքի նպատակն էր բարձրացնել հրշեջ-փրկարարների մարտական պատրաստվածությունը և ուսումնական պրոցեսի ընթացքում Հայոց ցեղասպանության թանգարանի աշխատակազմին սովորեցնել արտակարգ իրավիճակների դեպքում արդյունավետ գործելու վարքականոնները։

 «Նման դեպքում պայմանական հրդեհի տարբերակով երկու մարտական հաշվարկ ներգրավվեց։ Մինչև հրշեջ-փրկարարների ժամանումը թանգարանի աշխատակազմն իր ունեցած միջոցներով կազմակերպել էր հրդեհաշիջում։ Պայմանականորեն կային նաև տուժածներ։ Ժամանած հրշեջները կատարեցին բացազատում և հրդեհաշիջում, իրականացրին տարհանման աշխատանքներ, ինչպես նաև տուժածներին ցուցաբերեցին առաջին բուժօգնություն։ Այս ամենն իրականացվում է նախապես պլանավորված աշխատանքների շրջանակում։ 2024 թվականի ընթացքում արդեն հաստատվել էր հաջորդ տարվա ուսումնական վարժանքների աշխատանքային պլանը՝ մեկ շաբաթվա, մեկ ամսվա և մեկ տարվա կտրվածքով։ Ծրագրով արդեն իսկ ընտրվել են պետական, հանրային հիմնարկները, ուսումնական հաստատությունները և մասնավոր կազմակերպությունները»,- տեղեկացրել է Հակոբյանը։ 

Նա հավելել է, որ փրկարար ծառայությունն իրականացնում է նաև լայնածավալ իրազեկման աշխատանքներ ինչպես հանրակրթական դպրոցներում, այնպես էլ բուհերում, որպեսզի բոլորը տեղյակ լինեն արտակարգ իրավիճակներում ճիշտ գործելու վարքականոններին, ծանոթ լինեն հրշեջ միջոցներին, կարողանան անհրաժեշտության դեպքում դրանք կիրառել, համապատասխան տեղեկատվություն փոխանցել 911 ծառայությանը, կազմակերպել նախնական տարհանման աշխատանքներ և առաջին բուժօգնություն ցուցաբերել տուժածներին։