Բա Ալեն Սիմոնյանն ինչո՞ւ Աղդամը չպաշտպանեց, թող մնար, կռվեր, բա իր Հայրենիքը չէ՞ր․ արցախցի գործիչ (տեսանյութ)

Ազգային ժողովի նախագահ Ալեն Սիմոնյանը համոզված է, որ Լեռնային Ղարաբաղի հայերը հնարավորություն են ունեցել կռվել այն զենքով, որն այնտեղ եղել է: Փետրվարի 11-ին խորհրդարանում պատասխանելով լրագրողի այն հարցին, թե երբ ինքը կկարողանա վերադառնալ հայրենի Արցախ՝ Սիմոնյանը հայտարարել է, թե «երբ այնտեղ անվտանգ լինի»։ Իսկ այնտեղ, ԱԺ նախագահի կարծիքով, անվտանգ կլինի, երբ Հայաստանն ու Ադրբեջանը խաղաղության պայմանագիր կնքեն եւ կարգավորեն բոլոր հարցերը։

«Ամեն ինչ արվելու է, որպեսզի դուք վերադառնաք այնտեղ, երբ այնտեղ ապահով լինի, քանի որ դուք հեռացել եք այնտեղից, որովհետեւ անվտանգ չէր: Թեև դուք կարող էիք մնալ այնտեղ և պայքարել մինչև վերջ, բայց դուք դուրս եկաք», - ասել է ԱԺ նախագահը։

Իսկ մնալ ու պայքարել, ինչպես կարծում է Սիմոնյանը, արցախցիները կարող էին այն զենքով, որը Հայաստանը թողել էր այնտեղ։ Մինչդեռ, Լեռնային Ղարաբաղում փոխեցին իշխանությունը, «որը մի քանի օր անց ստորագրեց հռչակված պետության լուծարման մասին փաստաթուղթը»։ Արցախցի հասարակական գործիչ Աննա Մանգասարյանը վստահ է, որ այդ օրերին արցախցիները կռվել են այնպես, ինչպես երբևէ չեն կռվել․

«Ամսի 19-ին սեպտեմբերի արցախյան այն պատերազմն էր, որ երևի թե բոլոր արցախցիները միահամուռ պատերազմում էին։ Լինել 9 ամիս սովի մեջ, ու նման եռանդով պայքարել ադրբեջանցիների դեմ, որոնք ամեն օր նոր զենքեր, նոր տեխնիկա էին գնում, իսկ արցախցիները Ալիևի ու հայաստանյան իշխանության հետ միասին Արցախում ինչ զինամթերք կար, ամբողջը հանում էին, որպեսզի թուլացնեն բանակը և այլն։ Բայց ամեն արցախցի ամեն գնով պայքարում էր։ Ոչ մեկը հաճույք չի ստանում այն խոսքերից, որոնք հնչեցրեց Հայաստանի Ազգային ժողովի նախագահը»,- ասաց Մանգասարյանը։

Արցախցի գործիչը հիշեցնում է, որ Ալեն Սիմոնյանը ժամանակին Աղդամն իր հայրենիքն էր համարում, հիմա ինչո՞ւ է իր հայրենիքը լքել։

Մանգասարյանի խոսքով՝ Հայաստանը լքելու մասին թող մտածեն նրանք, ովքեր Արցախն ու Հայաստանը այլևս իրենց հայրենիքը չեն համարում, իսկ Ալեն Սիմոնյանը թող մտածի Աղդամը վերադարձնելու մասին։