Թրամփը Գազայի հարցում կակնկալի՞ Պուտինի աջակցությունը․ Հակոբ Բադալյան

Քաղաքագետ Հակոբ Բադալյանը տելեգրամի իր ալիքում գրել է․ 

«Օրինակ, հետաքրքիր է չէ, ի՞նչ խոսացած կլինեն Պուտինն ու Տրամպը Գազայի վերաբերյալ Տրամպի պատկերացման մասին: Ինչպես հայտնի է՝ արաբական, մահմեդական, իսլամական պետությունները դեմ են, գործնականում բոլորը արտահայտվել են Տրամպի պլանի դեմ՝՝ վերաբնակեցնել պաղեստինցիներին եւ Գազան հանձնել ԱՄՆ-ին:

Տրամպը այդ հարցում կակնկալի՞ Պուտինի աջակցությունը, հաշվի առնելով եւ այն, որ Ռուսաստանի որոշակի կապեր ունի ՀԱՄԱՍ-ի հետ, նաեւ Մերձավոր Արեւելքում ունի ազդեցություն: 

Ռուսաստանն ինչպես հայտնի է հայտարարում է, որ պաղեստինաիսրայելական հակամարտությունը պետք է հանգուցալուծվի երկու պետություն սկզբունքով: Գազան կարո՞ղ է լինել դրա գին, այսինքն՝ ԱՄՆ-ն էլ համաձայնի Պաղեստին պետության ստեղծմանը:

Ընդ որում, Տրամպ-Պուտին զրույցի ֆոնին խիստ հատկանշական էր հայտարարությունը Թուրքիայից: Իհարկե այն պաշտոնական չէր, սակայն կարծում եմ, որ Դավութողլուի հայտարարությունը համաձայնեցված էր պաշտոնական Անկարայի հետ: Իսկ հայտարարությունն այն մասին էր, թե՝ Գազան տվեք Թուրքիային, Թուրքիան կարող է լինել լավագույն «մանդատակիրը» Գազայի հարցում, մինչեւ վերջնական հանգուցալուծումներ: Ընդ որում հետաքրքիր էր, որ Դավութողլուն շեշտում էր, թե Գազայի այսպես ասած միջազգային իրավական վերջին պատկանելությունը եղել է Օսմանյան կայսրությունը, որից հետո եղել է բրիտանական մանդատը:

Դավութողլուի միջոցով Անկարան ըստ երեւույթին փորձում է շոշափել տրամադրություններ, միաժամանակ ներկայացնել հայտ՝ մի կողմից ԱՄՆ-Ռուսաստան պրոցեսի, մյուս կողմից դրա հանդեպ բրիտանական լուրջ խանդի միջեւ սակարկության համար»: