Փազլը հավաքելով կարծես թե ավելի է ուրվագծվում, թե Սիրիայում տեղի ունեցածը «փոխանակման» ինչ տրամաբանություն կարող էր պարունակել». Հակոբ Բադալյան

Քաղաքագետ Հակոբ Բադալյանը գրում է. «Սուդանի արտգործնախարարը Լավրովի հետ համատեղ ասուլիսում հայտարարել է, որ ամեն ինչ պայմանավորվել են Սուդանում ռուսական ծովային ռազմաբազայի շինարարության վերաբերյալ: Այդ մասին համաձայնագիրը Սուդանն ու Ռուսաստանը ստորագրել էին դեռեւս 2020 թվականին, սակայն բազայի շինարարությունն այսպես ասած կիսատ էր մնացել հետագայում՝ Սուդանում բախումների հետեւանքով:

Մի քանի օր առաջ, ի դեպ, անդրադարձել էի այդ թեմային։ Այդտեղ ներկայացրել եմ Սուդանում բախումների համառոտ նկարագրությունն ու նաեւ շեշտում էի, որ այնտեղ տեղի է ունեցել այսպես ասած ուժերի հարաբերակցության փոփոխություն՝ հօգուտ կառավարական ուժերի, որոնց աջակցում է Ռուսաստանը:

Սուդանն այդուհանդերձ դեմ էր արտահայտվում բազայի շինարարության շարունակությանը, քանի որ չէր ուզում խնդիրներ ունենալ Արեւմուտքի հետ:

Այժմ, Լավրովի հետ համատեղ ասուլիսում փաստորեն հայտարարվում է ամեն ինչ համաձայնեցնելու մասին: Սա թերեւս հնարավոր է համարել նաեւ Պուտին-Թրամփը հաղորդակցության որոշակի արդյունք:

Սուդանում ռուսական ռազմակայանը ըստ էության նշանակում է Ռուսաստանի ուժային ներկայություն Կարմիր ծովում, ինչը ստրատեգիական հարց է: Այդ հանգամանքը Մոսկվային թույլ կտա ավելի վստահ լինել Սիրիայի ռազմակայանների հարցում: Մասնավորապես, դրանք պահպանելը ռուսների համար այլեւս չի ունենա այն ստրատեգիական նշանակությունը, որ կունենար Սուդանում ռազմակայանի բացակայության պարագայում:

Հավանաբար դա է նաեւ պատճառը, որ Պուտինը հենց Թրամփի հետ հեռախոսազրույցից հետո է առաջին անգամ խոսել Սիրիայի նախագահ Ալ Շարաայի հետ: Այդ հեռախոսազրույցի առնչությամբ կարծիք էի հայտնել, որ դատելով Կրեմլի հաղորդագրությունից, Պուտինը կարծես թե Ալ Շարաային ակնարկել է, որ Ռուսաստանի հետ չաշխատելու դեպքում Սիրիայում կոունենա խնդիրներ: Ռուսներն ունեն այդ խնդիրները ստեղծելու հնարավորություն:

Սուդանի հարցում դիրքերի ամրացումը Պուտինին ըստ երեւույթին թույլ տվեց որոշակի ամրություն զգալ Սիրիայի նոր իշխանության հետ հարաբերության հարցում:

Փազլը հավաքելով կարծես թե ավելի է ուրվագծվում, թե Սիրիայում տեղի ունեցածը «փոխանակման» ինչ տրամաբանություն կարող էր պարունակել»: