Արայիկ Հարությունյանը 3 անգամ հրաժարական է տվել․ ինքն է բանակցել Շահրամանյանի և ևս 2 թեկնածուի հետ․ Քոչարյան

Արայիկ Հարությունյանի հրաժարականի հարցը ինքը՝ Արայիկ Հարությունյանը սկսել է քննարկել մոտ 3 ամիս առաջ մինչև Ղարաբաղի անկումը։ Այս մասին այսօր ասուլիսի ժամանակ հայտարարեց ՀՀ 2-րդ նախագահ Ռոբերտ Քոչարյանը՝ նշելով, որ Արցախի շրջափակման ժամանակ ինքը մշտական կապի մեջ է եղել Արկադի Ղուկասյանի և Բակո Սահակյանի հետ և տեղյակ է, թե ինչ է կատարվել։ 

«Այն ինչ կատավեց վերջին շաբաթը, դա 3-րդ փորձն էր հրաժարականի Արայիկ Հարությունյանի կողմից։ Ամեն անգամ, երբ քննարկում էին կազմակերպում, ասում էր՝ ես այլևս այդ ազդեցությունը չունեմ, խոսքս տեղ չի հասնում, չեմ ձգում, ճիշտ է, որ ես հրաժարական տամ և ամեն անգամ Բակո Սահակյանը և մյուսները համոզել են չանել դա։ Սակայն ինքը մարդկանց հավաքել և հայտարարել է, որ մեկ է ինքը հրաժարական է տալու և պետք է ճիշտ կողմնորոշվել, թե ում կարող է հանձնել իշխանությունը։ Սամվել Շահրամանյանը միակը չէր, ում նա համոզում էր, որ կարող է ստանձնել իշխանությունը, առնվազն 3 հոգու հետ նա անձամբ խոսել և համոզել է, որ կարող են ստանձնել իշխանությունը։ Չեմ ուզում անուններ տալ։ Արկադի Ղուկասյանն ու ԲԱկո Սահակյանը մեր հեռախոսազրույցների ժամանակ ինձ պատմում էին, որ այդքան բանը Արայիկ Հարությունյանն ասել է նաև Նիկոլ Փաշինյանին և նա շատ լավ գիտեր՝ ինչ է կատարվում Արցախում, ի՞նչ հեղաշրջում, ինչի՞ մասին է ընդհանրապես խոսքը»,- նշեց նա։  

Ինչ վերաբերում է հարցին, թե ինչու էր Քոչարյանը շնորհավորել Շահրամանյանին Արցախի նախագահ դառնալու կապակցությամբ, ապա Քոչարյանը պատասխանեց․ «Ես ընդհանրապես չէի ճանաչում Սամվել Շահրամանյանին։ Ինձ խնդրել են իմ ընկերները, որ Ղարաբաղում այս ծանր պահին այս մարդը պարտավորություն է վերցրել իր ուսերին, ինձ խնդրել են շնորհավորեմ և ինչ որ տեղ աջակցություն ցուցաբերեմ»,- ասաց քոչարյանը՝ ընդգծելով, որ այսօր այդ թեմաները շահարկելն ուղղակի անբարոյականություն է։ 

Սոնա Հարությունյան