ФСБ-ի աշխատակիցները ներխուժել են ՀՀ ոստիկանության բաժին. անհապաղ դադարեցնել նրանց ապօրինի գործողությունները ՀՀ-ում. ՀՔԱՎ

2025թ․-ի փետրվարի 13-ին ՀՔԱՎ գրասենյակի իրավական պաշտպանության ներքո գտնվող Ռոման Շկլովերին զանգահարել են ՀՀ ոստիկանության Երևան քաղաքի Մետրոպոլիտենի պահպանության բաժնից՝ հրավիրել բաժանմունք որոշ պարզաբանումներ ստանալու նպատակով։ Ռ․ Շկլովերը նույն պահին կապվել է ՀՔԱ Վանաձորի գրասենյակի հետ և Կազմակերպության փաստաբան Սամսոն Գալստյանի ուղեկցությամբ ներկայացել բաժին։ Ոստիկանության բաժնում հայտնել են, որ Ռուսաստանի Դաշնությունում Ռ․ Շկլովերի դեմ քրեական գործ կա հարուցված, բայց դեռևս խափանման միջոց ընտրված չէ։ Այս մասին նշված է ՀՔԱ Վանաձորի գրասենյակի տարածած հաղորդագրության մեջ:

Հաղորդագրությունում նաեւ ասվում է. «Այդ ընթացքում փաստաբան Ս․ Գալստյանի ներկայությամբ ՀՀ ոստիկանության բաժին  են ներխուժել ՌԴ իրավապահ մարմինների ներկայացուցիչներ, ամենայն հավանականությամբ, Անվտանգության դաշնային ծառայության՝ ФСБ-ի աշխատակիցներ և ՀՀ ոստիկանների ներկայությամբ Ռ․Շկլովերին փորձել են համոզել են ինքնակամ գնալ իրենց հետ և հանձնվել ՌԴ-ին, խոստանալով, որ   «իր հետ ամեն ինչ լավ կլինի»։  ՀՔԱ Վանաձորի գրասենյակի փաստաբան Ս․Գալստյանը թույլ չի տվել նման ապօրինություն, և Ռ․Շկլովերն ինքն էլ հրաժարվել է ФСБ-ի աշխատակիցների հետ համագործակցելուց։

Ստացվում է , որ ՌԴ-ի անվտանգության աշխատակիցները ազատ ելք ու մուտք ունեն ՀՀ Ոստիկանության բաժանմունքներ, անարգել կարողանում են հանդիպել բաժանմունքներում գտնվող ՌԴ քաղաքացիների հետ և նրանց «հորդորում են»  ինքնակամ հանձնվել ՌԴ-ին։

Խստորեն դատապարտում ենք և՛ ՌԴ իրավապահ մարմինների ներկայացուցիչների ակնհայտ ապօրինի գործողությունները ինքնիշխան պետության տարածքում, և՛ խստորեն պահանջում ենք ՀՀ իրավապահ մարմիններից անհապաղ միջոցներ ձեռնարկել ոչ միայն դադարեցնելու նման ապօրինությունները, այլև նման ապօրինի գործողություն կատարողների նկատմամբ հարուցել քրեական հետապնդում։

Սա առաջին դեպքը չէ, երբ ՌԴ անվտանգային մարմինները Հայաստանի Հանրապետությունում հետապնդում են ՌԴ քաղաքացիների։ 2024թ․-ի մարտին ՀՔԱՎ գրասենյակը ահազանգեր էր ստացել քաղաքական հետապնդումից խուսափած և Հայաստանում ապաստանած ՌԴ քաղաքացիներից։ Ահազանգերը ամենայն հավանականությամբ մնացել են անհետևանք, որի պատճառով էլ ՌԴ անվտանգության մարմինների աշխատակիցները շարունակում են ազատ ապօրինություններ թույլ տալ Հայաստանի Հանրապետության տարածքում, այն էլ ՀՀ իրավապահ մարմինների աշխատակիցների հետ համագործակցությամբ։

Հայաստանում ապաստանած ՌԴ քաղաքացիները իրենց բնակության վայրերի մոտ նկատել էին Ռուսաստանի Դաշնության զինվորական համազգեստով անձանց, որոնք անթաքույց հետևում էինն իրենց, հետաքրքրվում՝  ովքեր են բնակվում իրենց կողմից վերահսկվող բնակարաններում։

Մեր կողմից հաջողվել էր պարզել, որ ՌԴ զինվորական համազգեստով իրավապահ մարմինների ներկայացուցիչներն օգտագործում էին  չհաշվառված, հայկական  պետհամարանիշով մարդատար  ավտոմեքենա, որը նախատեսված պետք է լիներ բացառապես  օպերատիվ հետախուզական գործողություններ կատարելու համար։ Դեպքի մանրամասները՝ ԱՅՍՏԵՂ։