Ինչպես 0-ից հիմնել բիզնես ու չձախողել․ Հայ գործարարների «100 և 5 բիզնես պատմություններ գիրքը»՝ նոր գործարար ուղեցույց

Հայաստանում առաջին անգամ հայ գործարարներն ու հանրությանը հայտնի ապրանքանիշ ստեղծողները անկեղծացել են հանրության առաջ ու կիսվել իրենց բիզնեսի ստեղծման, կայացման պատմություններով՝ միաժամանակ անդրադառնալով նաև ձախողումներին։ Յուրաքանչյուր գործարար մի նոր լուծում է առաջադրում գրքում և հաղորդում լավատեսություն ու հուսահատությունները հաղթահարելու նոր բանաձև։ Խոսքը՝ Հայ գործարարների «100 և 5 բիզնես պատմություններ գրքի» մասին է, որը նման ձևաչափով հայ ընթերցողին է ներկայանում առաջին անգամ։ Գրքի շնորհանդեսը կայացավ երեկ՝ գիրք նվիրելու օրը։ 

Գրքի թողարկման նպատակն է ձևավորել գրագետ բիզնես համայնք և նպաստել Հայաստանում ՓՄՁ ոլորտի զարգացմանը։ Այն հայկակական ձեռնարկատիրական հմտությունների զարգացման առաջին շտեմարանն է, որը տարբեր գործարարների օրինակով սովորեցնում է՝ ինչպե՞ս կառուցել սեփական բիզնեսը՝ ծանոթացնելով բիզնես առաջնորդների իրական փորձի ու ձախողումներիի օգտակար պատմություններին։ Անձի ինքնակատարելագործման և ինքնազարգացմանն ուղղված այս գիրքը՝ իրական ու անկեղծ պատմություններով կմոտիվացնեն և կօգնեն կյանքի կոչել նոր գաղափարներ, կսովորեցնեն՝ ինչպես 0-ից հիմնել բիզնես , ձևավորել առաջնորդական հմտություններ ու բիզնես մտածողություն։ Ինչպե՞ս դնել նպատակ ու գնալ դրա ետևից։ 

Գիրքը գաղափարներն իրականության վերածած, 0-ից, ֆինանսական ակնառու ձեռքբերումների և հաջողութունների հասած առաջնորդների մասին է, նրանց կողմից կիրառած բիզնեսի զարգացման տարբեր մոդելների, ռազմավարական գործիքների, մարքեթինգի, վաճառքի արդի մեթոդների, բիզնես մտածողության նոր բանաձևերի, ստարտափների ստեղծման ու կայացման արդյունավետ լուծումների, առողջ մրցակցության մեջ լինելու արդի քայլերի, շուկայում ճիշտ դիրքավորվելու և այլն ի մասին։ Հեղինակը՝ նախկին լրագրող, «Հայաստան-Արցախ-Սփյուռք» համահայկական ամսագրի գլխավոր խմբագիր, «Հայրենք -սփյուռք կապերի զարգացման» ՀԿ հիմնադիր, ԷՅ ԷՅ ԴԻ Փրոջեքթ մարքեթինգային ընկերության հիմնադիր Լուսինե Նազարյանն է, ով իր թիմակիցների հետ ցանկացել է մեջբերել հայտնի բիզես առաջնորդների հաջողության բանաձևերը և տալ բազմաթիվ «ինչուների» պատասխաններ, որոնք ընթերցողների շրջանում կձևավորեն նոր աշխարհընկալում, կնպաստեն սեփական ներուժի վերարժևորմանը ու դեռևս չիրացված հնարավորությունների բացահայտմանը։

Գրքում իրական փաստերով ներկայացված են ավելի քան 105 տարբեր ոլորտներում ակնառու հաջողությունների հասած հայտնի գործարարների անկեղծ խոստովանությունները՝ ձախողումների, անկումների և վերելքների վերաբերյալ՝ ընթերցողին հաղորդելով գրագետ բիզնես սկսելու և այն վարելու բոլոր ձեռնարկատիրական գաղտնիքները։ 

«Որպես Հայաստանի բիզնես դաշտի երկարամյա դիտորդ և մասնակից, ես անձամբ ականատես եմ եղել մեր տնտեսության բազմաշերտ փոխակերպումներին։ Խորհրդային կենտրոնացման տնտեսությունից մինչև այսօրվա կենսունակ, բազմազան շուկան։ Այս գիրքը այդ ճանապարհի վկայությունն է։ Երբ թերթես 105 հայկական բիզնես պատմությունների այս ժողովածուի վերջին էջը, կհայտնվես ոչ թե վերջում, այլ սկզբում։ Այս էջերում ամեն մի պատմություն հայկական ձեռներեցության հարուստ գոբելենի թել է՝ գոբելեն, որը շարունակում է հյուսվել ամեն անցնող օրվա հետ։ Այս պատմությունները պարզապես հաջողության պատմություններ չեն. դրանք մեր ազգի արարող տեսակի վկայություններ են։ 

Դրանք մեզ հիշեցնում են, որ բիզնեսի աշխարհում, ինչպես և կյանքում, մեր ամենամեծ ակտիվը ոչ թե մեր կապիտալն է, այլ մեր բնավորությունը» գրքում և շնորհանդեսին իր ելույթի խոսքով հանդես եկավ «Մանասյան գրուպ» կրթական և խորհրդատվական կենտրոնի տնօրեն, փորձառու բիզնես փորձագետ Հայկ Մանասյանը։ BSCOSMO գործարար ակումբի համահիմնադիր Անդրեյ Հայրիյանն էլ հավելեց, որ նման նախաձեռնությունը բիզնես համայնքի համար ոչ միայն կարևոր է, այլև շատ պետք է։ «Երբ տեսնում ես, թե բիզնեսով զբաղվողները ինչ ճանապարհ են անցել, ինչ դժվարություններ են հաղթահարել, ոնց են հաջողել՝ դա անհնար է, որ չմոտիվացնի։ Ես վստահ եմ, որ ամեն մի պատմություն, իսկ գրքում կա 105 պատմություն մի նոր մոտիվացիա է՝ նոր գաղափարներ փորձելու, չվախենալու, առաջ գնալու», նշեց Անդրեյ Հայրիյանը։ Գիրքը հայերեն և անգլերեն լեզուներով է և կլինի վաճառքում առաջիկա օրերին։