Ֆրանսիայում անօթևանները վիճակախաղով 500 հազար եվրո են շահել, սակայն այդպես էլ իրենց շահումը չեն վերցրել

Ֆրանսիայի հարավ-արևմտյան Թուլուզ քաղաքում երկու անօթևաններ գողացել են բանկային քարտ և այն օգտագործել վիճակախաղի տոմս գնելու համար՝ շահելով 500 հազար եվրո, գրում է La Dépêche du Midi թերթը։

Փետրվարի սկզբին Թուլուզի բնակիչը պարզել է, որ ինչ-որ մեկը ներխուժել է իր մեքենան և գողացել պայուսակը, որում, ի թիվս այլ բաների, եղել է իր բանկային քարտը։ Երբ նա գնացել է բանկ՝ արգելափակելու այն, պարզել է, որ գողերը դրանից մոտ 50 եվրո արդեն ծախսել են ծխախոտի վրա։ Նա գնացել է այնտեղ վաճառողից հարցնելու, թե արդյոք գողերը թողել են այնտեղ իր պայուսակն իր իրերի հետ, բայց ոչինչ չի գտել։

«Վաճառողը հիշել է այդ մարդկանց, ըստ նրա՝ նրանք 30 և 40 տարեկան երկու անօթևաններ են եղել, որոնք, բացի ծխախոտից, վիճակախաղի տոմսեր են գնել»,- պատմել է բանկային քարտի սեփականատեր Ժան-Դավիդը։ Քանի որ դա ակնթարթային վիճակախաղ է եղել, անօթևաններին անմիջապես տեղեկացրել են իրենց մեծ շահույթի մասին, բայց նրանք արագ լքել են խանութը և չեն վերադարձել։

«Նրանք այդպես էլ չեն եկել իրենց շահումները վերցնելու: Այս պահին Française des Jeux-ը արգելափակել է տոմսը»,- ասել է տղամարդը։ Կազմակերպությունը լրագրողներին պարզաբանել է, որ նման իրավիճակներում շահումները արգելափակվում են մինչև դատական ​​գործընթացի ավարտը։