Գարիկ Գալեյանի գործով վերաքննիչ բողոքները կքննվեն Սևակ Համբարձումյանի նախագահությամբ

 «Փաստինֆո»

Արցախյան 44-օրյա պատերազմում նահատակված Մխիթար Գալեյանի հորը՝ Գարիկ Գալեյանին ազատազրկման դատապարտելու վճռի դեմ վերաքննիչ բողոքը կքննվի Վերաքննիչ քրեական դատարանի դատավոր Սևակ Համբարձումյանի նախագահությամբ, դատական կազմում են նաև Արմեն Դանիելյանը, Հարություն Պետրոսյանը։ Այս մասին «Փաստինֆո»-ն տեղեկանում է «Դատալեքս» համակարգից։

Ինչպես արդեն տեղեկացրել ենք՝ Երևանի ընդհանուր իրավասության քրեական դատարանը՝ դատավոր Մասիս Մելքոնյանի նախագահությամբ, հունվարի 17-ին մեղավոր է ճանաչել Գարիկ Գալեյանին և դատապարտել ազատազրկման՝ 2 տարի ժամկետով, ապա, հաշվակցելով Գալեյանի՝ նախաքննության ընթացքում անազատության մեջ գտնվելու 6 ամիս 27 օր ժամկետը, վերջնական պատիժ նշանակվել 1 տարի վեց ամիս ժամկետը։ Դատարանը միևնույն ժամանակ անմիջապես փոխել է Գալեյանի նկատմամբ ընտրված խափանման միջոց բացակայելու արգելքը՝ տնային կալանքով։

«Փաստինֆո»-ի հաղորդմամբ՝ դատավճռի դեմ վերաքննիչ երկու բողոք է ներկայացվել, երկուսն էլ՝ պաշտպանության կողմից։ Բողոքներից մեկով պաշտպան Վահան Հովհաննիսյանը պահանջել է բեկանել առաջին ատյանի դատավճիռը և կայացնել արդարացման դատական ակտ՝ ճանաչելով և հռչակելով Գալեյանի անմեղությունը։ Պաշտպանն արձանագրել էր, որ Գալեյանի գործողություններում խուլիգանություն չկա։

Մյուս պաշտպանը՝ Վահան Գևորգյանը, ևս պահանջում է բեկանել դատական ակտը, սակայն պաշտպանն այս բողոքով մեղմացում է խնդրում, մասնավորապես, պահանջում է բեկանել դատական ակտը, որպես պատիժ նշանակել տուգանքը կամ առավել նվազ ժամկետով ազատազրկումը՝ նշանակված պատիժը պայմանականորեն չկիրառելով: