2024 թվականը վերջին 20 տարվա ամենախաղաղ և կայուն տարին է եղել. ՀՀ կառավարություն

2024 թվականը վերջին 20 տարվա ամենախաղաղ և կայուն տարին է եղել մեր արտաքին սահմանների համար, որը պայմանավորված է տարածաշրջանային և միջազգային ակտիվ քաղաքականությամբ, այս մասին նշվում է Հայաստանի Հանրապետության կառավարության ծրագրի (2021-2026 թթ.) 2024 թվականի կատարման ընթացքի և արդյունքների մասին զեկույցում։

Զեկույցում նշվում է, որ կառավարության վարած արտաքին քաղաքականության նպատակը Հայաստանի Հանրապետության անկախությունը, ինքնիշխանությունը, անվտանգությունը, տարածքային ամբողջականությունը պահպանելն ու ամրապնդելն է, Հայաստանի տնտեսական զարգացման համար արտաքին նախադրյալներ ստեղծելը, ինչը կարճաժամկետ, միջնաժամկետ և երկարաժամկետ առաջնահերթություն է:

«Այս նպատակի իրագործման համար Կառավարությունը որդեգրել է բալանսա­վորված և բալանսավորման արտաքին քաղաքականություն, որն արտահայտվում է նաև տարածաշրջանային քաղաքականության ոլորտում՝ խնդիր ունենալով ախտորոշել Հայաստանի նկատմամբ տարածաշրջանում առկա բացասական և ագրեսիվ դրսևորումները, կառավարել ապա և տարածաշրջանային մտածված քաղաքականության շնորհիվ նվազեցնել և երկարաժամկետ հեռանկարում զրոյացնել դրանք: Այս խնդրի իրագործման համար, ինչպես նախկինում, շարունակում է առանցքային  մնալ վարվող քաղաքականությունների լեգիտիմությունը միջազգային իրավունքի և կարգի տեսանկյունից:

Որդեգրված ռազմավարությունը ցույց է տալիս իր արդյունավետությունը. 2024 թվականը վերջին 20 տարվա ամենախաղաղ և կայուն տարին է եղել մեր արտաքին սահմանների համար, որը պայմանավորված է տարածաշրջանային և միջազգային ակտիվ քաղաքականությամբ»,- ասվում է զեկույցում։