Իշխանության քաղաքական դեգեներացիան՝ 2 սկզբունքով․ Արման Աբովյան

ԱԺ նախկին պատգամավոր Արման Աբովյանը գրել է․

«Քաղաքագիտության մեջ մի տերմին կա՝ քաղաքական դեգեներացիա։ Քաղաքական համակարգերի դեպքում դա արտահայտվում է երբ որևէ քաղաքական միավոր զբաղվում է պետության կենսական շահերի հաշվին  իր նեղ շահերը սպասարկելով կամ արտաքին խաղացողների կամքն ու հրամանները կատարելով։ 

Մեր դեպքում Հայաստանի իշխանության քաղաքական դեգեներացիան համատեղում է վերը նշված երկու սկզբունքները։ 

Օրինակ, երեկ Հայաստանի կառավարության ղեկավարը կեղծ հրճվանքով հայտարարեց, թե հայկական իշխանությունը «հորինել է» «կոմունիկացիաների բացման» այնպիսի տարբերակ, որը հարյուր տոկոսով ընդունելի կլինի Հայաստանի և Ադրբեջանի ժողովուրդների համար ։ 

Ծանոթ արտահայտություն, չէ՞... Եթե չեմ սխալվում՝ Արցախը  թուրք-ադրբեջանական տանդեմին հանձնելուց առաջ ներկայիս իշխանությունը  նմանատիպ արտահայտություն էր անում, թե՝ «Ղարաբաղի հարցը պետք է ընդունելի լինի Հայաստանի և Ադրբեջանի ժողովուրդների համար»։ 

Փաշինյանական իշխանությունների քաղաքականության դեգեներատիվությունն առաջին հերթին դրսևորվում է երկու սկզբունքային առումով։ 
1․ Հայկական իշխանությունները համակարգային (սա կարևոր է ) զիջումների են գնում թուրք-ադրբեջանական տանդեմին Հայաստանի տարածքային ամբողջականության, անկախության և ինքնիշխանության հաշվին, սակայն դա ներկայացնում են որպես «հաղթանակ»՝ դրանով իսկ կրկին խաբելով սեփական ընտրողներին:
2․ երկրի բարձրագույն ղեկավարների իրարամերժ հայտարարությունները, հակապետական քայլերն ու անհեթեթ նախաձեռնությունները հիմք են տալիս ենթադրելու, որ գործ ունենք Հայաստանի կենսական շահերի համար խիստ վտանգավոր  քաղաքական ուժի հետ, որն այսօր ղեկավարում է երկիրը: 
Սա փաստ է, որն ուղղակիորեն մատնանշում է երկրի պետական շահերի պաշտպանության ողջ ճարտարապետության տոտալ դեգեներացիայի մասին»։