Ֆինանսական խարդախությունների զոհերը բողոքի ակցիա կանեն

Վաղը՝ փետրվարի 28-ին Ժամը 14։00-ին գլխավոր դատախազության շենքի դիմաց տեղի կունենա վերջին ամիսներին Հայաստանում Ֆինանսական խարդախությունների զոհ դարձած քաղաքացիների բողոքի ակցիան։

Խարդախ անձինք ապօրինի կերպով օգտագործել են քաղաքացիների անձնական տվյալները, նրանց անունից վարկեր են ձևակերպել բանկերում՝ առանց իրենց իմացության։ Արդյունքում՝ մարդիկ հայտնվել են ծանր ֆինանսական ճնշման տակ, իսկ բանկերը ոչ միայն չեն աջակցում իրենց իրական զոհերին, այլև հետապնդում են նրանց վարկերի վճարումների համար։

Բանկերի և ֆինանսական կառույցների անգործության հետևանքով, մարդիկ ստիպված են վճարել այն գումարները, որոնք իրենք երբեք չեն վերցրել։ Հակառակ դեպքում կա սպառնալիք, որ քաղաքացիների ունեցվածքից կբռնագանձվի։

Քաղաքացիները պահանջելու են արդար և օբյեկտիվ քննություն, քաղաքացիների ապօրինի վարկային բեռի անհապաղ չեղարկում, հանցավոր սխեմաների բացահայտում և մեղավորների պատիժ, բանկային համակարգում վերահսկողության ուժեղացում՝ ապօրինի վարկավորման դեպքերը կանխելու համար։