Մեր համայնքի ղեկավարները կառչած չեն աթոռից. Խուդաթյանը՝ Փարաքարի ընտրությունների մասին

Իմ տպավորությունն այնպիսին են, որ Գյումրիում քաղաքային իշխանությունը հրաժարվեց իրականացնել իր գործառույթները: Այդ մասին, այսօր՝ փետրվարի 27-ին, կառավարության նիստից հետո  ճեպազրույցների ժամանակ ասաց ՏԿԵ նախարար Դավիթ Խուդաթյանը՝ անդրադառնալով դիտարկմանը, որ ՔՊ-ն իշխանափոխությունից առաջ այլ արժեքներ էր դավանում՝ հիմա չի հաշտվում ՏԻՄ-երում իր պարտության հետ ու խլում է իշխանությունը հաղթած ուժերից ինչպես Գյումրիում, Վանաձորում, Փարաքարում:

«Գյումրիում և հանրապետության այլ համայնքներում սկսվել է պրոցես, որտեղ համայնքային հողատարածքները, որոնք օրենքի խախտմամբ են օտարվել՝ վերադարձվում են համայնքին։ Սա ապօրինի օտարված գույքը հետ վերադարձնելուն միտված քայլ էր։ Գյումրիում ԺՊ-ի նշանակմամբ անիշխանության վիճակը հանգուցալուծվել է և առաջիկա ՏԻՄ ընտրություններն ամբողջությամբ կհանգուցալուծեն Գյումրիի շուրջ իրավիճակը»,- ասաց նա։

Ինչ վերաբերում է Փարաքարին, Խուդաթյանը նշեց, որ Փարաքարի մասով ունենք ամբողջությամբ այլ պատկեր. «Մենք պատասխանատվություն ենք կրում այն միջադեպերի համար, որում հայտնվում են մեր գործընկերները։ Փարաքարում ընտրությունները նշանակվել են հենց այս տրամաբանությամբ, որովհետև համայնքի ղեկավարի պաշտոնակատարը իրավիճակի բերումով հայտնվել է մի իրավիճակում, որ հանցագործություն է տեղի ունեցել ու դրա հետ կապված ինքը քաղաքական պատասխանատվություն էր ստանձնել ու հրաժարական տվել։

Սա ցույց է տալիս, որ մեր համայնքի ղեկավարները կառչած չեն աթոռից, թեև արդեն ապացուցված է, որ միջադեպն իր մասնակցությամբ չի եղել ու ինքը սպանության պրոցեսին ներկա է եղել անհաջող պատահականության արդյունքում»,- նշեց նա։