«Արաբկիր» ԲՀ-ԵԴԱԻ-ում իրականացվում են հանրապետությունում և տարածաշրջանում եզակի բժշկական ծառայություններ

«Արաբկիր» ԲՀ–ԵԴԱԻ–ի Հանրապետական մանկական պաթանատոմիական կենտրոնը հայտարարություն է տարածել, որում ասված է․

«Հայտնում ենք, որ «Արաբկիր» Բժշկական Համալիր Երեխաների և Դեռահասների Առողջության Ինստիտուտը հանդիսանում է հանրապետության մանկական խոշորագույն բժշկական կենտրոններից մեկը, որտեղ տարեկան բուժօգնություն են ստանում` ավելի քան 20000 հիվանդանոցային (ստացիոնար) և շուրջ 110000 ամբուլատոր պացիենտներ: Բուժ. հաստատությունը մշտապես ՀՀ Առողջապահության Նախարարության հետ համատեղ պայքարում է մանկական մահացության դեմ և իրականացնում է միջոցառումներ երկրում մանկական մահացության նվազեցմանը միտված:

«Արաբկիր» ԲՀ-ԵԴԱԻ-ում իրականացվում են հանրապետությունում և տարածաշրջանում եզակի բժշկական ծառայություններ. վիրահատություններ, կլինիկական սուր վերականգնողական ծառայություններ, երիկամի և լյարդի փոխպատվաստման վիրահատություններ, որոնց մեծ մասը իրականացվում է երեխաների մոտ։ «Արաբկիր» ԲՀ-ԵԴԱԻ-ին մշտապես հետևում է բժշկագիտության զարգացմանը և առաջնորդվում է նորանոր ներդրված ստանդարտներով` համագործակցելով տարբեր միջազգային կազմակերպությունների հետ։

«Արաբկիր» ԲՀ-ԵԴԱԻ-ին ունի երրորդ մակարդակի վերակենդանացման բաժանմունք, որտեղ ընդունվում են ողջ հանրապետությունից ծայրահեղ ծանր վիճակում գտնվող երեխաներ` այդ թվում այլ հիվանդանոցներից տեղափոխված: Ելնելով ախտորոշումներից, հիվանդության ընթացքից, ինչպես նաև բնածին արատների առկայությունից, հիվանդության ելքերը լինում են տարբեր` առողջացում, լավացում, քրոնիկացում և ցավոք սրտի բժիշկների ու բուժհաստատության համար անցանկալի ելք` մահ:

«Արաբկիր» ԲՀ-ԵԴԱԻ-ին կից գործում է հանրապետական մանկական պաթանատոմիական կենտրոն, որտեղ իրականացվում են հյուսվածքաբանական հետազոտություններ, որոնց իրականացումը կարևոր է բժշկագիտության համար և որոնք օգնում են բժիշկներին ճշգրիտ ախտորոշումներ դնելուն, և հետագա բուժումը պատշաճ կազմակերպելու համար:

«Արաբկիր» ԲՀ-ԵԴԱԻ-ի հանրապետական մանկական պաթանատոմիական կենտրոնը աշխատում է հանրապետության այլ բժշկական հաստատությունների հետ` պայմանագրային հիմունքներով, որոնց շրջանակներում իրականացվում են նշված բժշկական կենտրոններում մահացած պացիենտի դիահերձումը և պաթանատոմիական հետազոտությունների իրականացումը։

Մանկական մահերի դիահերձումը կատարվում է բացառապես անվճար` և մահացածի ծնողը կամ հարազատը որևիցե գումար չի վճարում նշված ծառայության դիմաց։

«Արաբկիր» ԲՀ-ԵԴԱԻ-ի կենտրոնին կից տարածքում գործում է նաև հոգեհանգստի սրահ, սակայն մինչ օրս դեռևս չի գրանցվել մանկական հոգեհանգստի կամ թաղման որևիցե արարողություն»: