Անդառնալիության կետն անցել ենք, այլևս հետդարձի ճանապարհ չունենք. Ռուբեն Վարդազարյան

Կառավարության ծրագրով նախատեսված դատաիրավական բարեփոխումներից ոչ մի ծրագիր այս իշխանությունը լիարժեք չի իրականացրել, միայն 2 ծրագիր կա, որ կիսատ-պռատ իրականացվել է, «ՀՀ կառավարության գործունեության լեգիտիմությունը» թեմայով քնարկմանն ասաց ԲԴԽ նախկին նախագահ Ռուբեն Վարդազարյանը։

Նա խոստովանեց, որ այս քննարկմանը մասնակցելով՝ կրակում է ինքն իր ոտքին։

«Իմ քրեական գործով դատաքննությունը գրեթե ավարտվել է, մնացել է վերջին խոսքը, ես վստահ եմ, որ իշխանություններն իմ այսօրվա մասնակցությունը շատ բացասական են գնահատելու ու հետևանքներ է ունենալու, բայց այն անձինք, ովքեր ունեն հստակ քաղաքացիական դիրքորոշում, պարտավոր են ցույց տալ աղետալի վիճակը, որն այսօր գոյություն ունի»,- նշեց Վարդազարյանը։

ԲԴԽ նախկին նախագահի խոսքով՝ նախատեսվում էր դատավորների բարեվարքության ստուգում, բայց հարց է առաջանում՝  բարեվարքությունը ստուգողների բարեվարքությունը ստուգվա՞ծ է։

Ըստ Վարդազարյանի՝ Հակակոռուպցիոն դատարանի ստեղծումն անթույլատրելի էր, քանի որ առանձին հակակոռուպցիոն օրենսդրություն չկա, կա մեկ Քրեական օրենսգիրք, մեկ Քրեական դատավարության օրենսգիրք։

«Այսինքն՝ այդ դատարանը ոչ մի բանով չի տարբերվում մյուս դատարաններից։ Դա շատ արագ ձևավորված, իշխանության քիմքին հաճելի մարդկանցով ձևավորված դատարան էր, որտեղ, կոպիտ ասած, ընդամենը կատարում են պատվերներ։ Լինում են, իհարկե, դեպքեր, երբ դատարանը կարողանում է իշխանությանը ոչ այդքան հաճելի որոշում կայացնել, բայց դա 1 տոկոս է կազմում»,- ընդգծեց նա։

ԲԴԽ նախկին նախագահի խոսքով՝ 2018 թվականից սկսած՝ արդարադատության վիճակը Հայաստանում ոչնչով չի փոխվել։

 «Դատավորները քաղաքական իշխանության քիմքին հաճելի դատական ակտեր են հրապարակում և այս պրոցեսը խորանում է։ Ընդ որում, մենք անդառնալիության կետն էլ ենք անցել, այսինքն՝ մի պահ ընդունենք, որ հենց այսօր իշխանությունը գնում է, գալիս է ազգին նվիրյալ իշխանություն և ասում՝ «դե եկեք հետ դառնանք», բայց այլևս հետդարձի ճանապարհ չունենք։ Լրջագույն դատական ռեֆորմի կարիք ունենք, լյուստրացիա, երբ բոլորն ազատվում են պաշտոններից, բոլոր դատարանները լուծարվում են, շատ արագ ստեղծվում է մի նոր հանձնաժողով, նոր դատարաններ ենք ստեղծում։ Փորձ կա, նման բան տեղի է ունեցել Խորհրդային Միության փլուզումից հետո և վատ արդյունք չի տվել։ Ցավոք սրտի, այդ անդառնալիության կետը անցել ենք։ Հայաստանին նոր դատական համակարգ է հարկավոր»,- հավելեց Ռուբեն Վարդազարյանը։