Անթիլիասի Մայրավանքում աբեղայության երկու նորընծաների կոչման արարողությունն է տեղի ունեցել

Անթիլիասի Մայրավանքում աբեղայության երկու նորընծաների կոչման արարողությունն է տեղի ունեցել, հայտնում են Կաթողիկոսության մամուլի ծառայությունից․
 

«Օրհնութեամբ եւ տնօրինութեամբ Սուրբ Աթոռոյս գահակալ Ն.Ս.Օ.Տ.Տ. Արամ Ա. Վեհափառ Հայրապետին, հայ եկեղեցւոյ Մեծի Տանն Կիլիկիոյ Կաթողիկոսութիւնը իր ուխտեալ Միաբանութեան շարքերուն մէջ կ՚ընդունի հայ եկեղեցւոյ ծառայութեան նուիրուած երկու սարկաւագներ՝ Բարեշնորհ Կարէն Սարկաւագ Եօսուլքանեան ու Բարեշնորհ Յակոբ Սարկաւագ Ճուլֆայեան։ Ընծայեալներուն կոչման եւ ուխտի արարողութիւնը կատարուեցաւ Անթիլիասի Մայրավանքի Սուրբ Գրիգոր Լուսաւորիչ Մայր Տաճարին մէջ, Շաբաթ, 1 Մարտ 2025-ի երեկոյեան, ձեռամբ Բերիոյ Հայոց Թեմի առաջնորդ Գերշ. Տ. Մակար Արք. Աշգարեանի եւ խարտաւիլակութեամբ Սուրբ Աստուածածին Վանքի վանահայր Գերպ. Տ. Շնորհք Ծ. Վրդ. Աշըգեանի։
 

Կոչման եւ ուխտի արարողութեան ընթացքին ընծայեալները կատարեցին հաւատքի խոստովանութիւն։ Այս առումով, անոնք, խարտաւիլակ հայր սուրբին առաջնորդութեամբ, Մայր Տաճարի մուտքէն ծնկադիր ուղղուեցան դէպի դաս, ուր ձեռնադրիչ սրբազան հայրը զանոնք հաւատաքննութենէ անցընելով՝ հաստատեց հայ եկեղեցւոյ ուղղափառ դաւանանքին մէջ եւ մեր եկեղեցւոյ սրբազան հայրապետներու հաստատած կանոններուն նկատմամբ ամրապնդեց անոնց հաւատարմութիւնը։ Ապա, առաջի Աստուծոյ, Վեհափառ Հայրապետին, ձեռնադրիչ սրբազան հօր, Կիլիկեան ուխտեալ Միաբանութեան եւ հաւատացեալներու, Մայր Խորանին դիմաց ծունկի գալով՝ ընթերցին հայ եկեղեցւոյ Մեծի Տանն Կիլիկիոյ Կաթողիկոսութեան դրաւոր ու պատմական Սուրբ Աթոռին զինուորագրութեան ու հաւատարմութեան իրենց ուխտագրերը:
 

Եկեղեցական արարողութիւնը իր աւարտին հասաւ «Հայր մեր»ի երգեցողութեամբ եւ Հայրապետին արձակման խաղաղութեամբ»։