Այս կարճ ժամանակահատվածում արդեն իսկ ունենք արձագանքներ Եվրոպայից․ Արտակ Զեյնալյան (տեսանյութ)

Ոչ միայն այս երկու շաբաթվա ընթացքում, այլև հանձնաժողովի առաջին նիստից մինչև ԱԺ լսումներ ընկած ժամանակահատվածում մենք արդեն ունենք արձագանքներ Եվրոպայից. ոչ միայն քաղաքական մակարդակով արձագանքներ, այլև այնպիսի ծրագրեր, որոնք ներկայացված եղել են դրամաշնորհի համար ՀՀ տարբեր կառույցների կողմից, որոնք ժամանակին մերժված են եղել, իրենց իսկ նախաձեռնությամբ առաջարկություն է եղել նորից ներկայացնել այդ ծրագրերը՝ ՀՀ օրենսդրությունը եվրոպական չափանիշներին համապատասխանեցնելուն ուղղված: Այդ մասին ԱԺ եվրոպական ինտեգրման հարցերի մշտական հանձնաժողովի նիստին «Եվրամիությանը Հայաստանի անդամակցելու գործընթացի մեկնարկի մասին» նախագծի՝ երկրորդ ընթերցմամբ քննարկման ժամանակ ասաց «Եվրաքվե» նախաձեռնող խմբի լիազոր ներկայացուցիչ Արտակ Զեյնալյանը:

«Բացի դրանից՝ նաև եղել է Բալթիկ երկրների համաժողովը, որտեղ քաղաքական բազմաթիվ ուղերձներ են եղել, մեսիջներ, առաջարկներ»,- ասաց նա՝ պատասխանելով ԱԺ «Հայաստան» խմբակցության պատգամավոր Արմեն Գևորգյանի հարցին, թե ՀՀ-ն ինչ արձագանքներ է ստացել եվրոպական պաշտոնական կառույցների կողմից, և արդյոք կա ֆորմալ արտահայտված ցանկություն՝ սկսելու անդամակցության վերաբերյալ որևէ գործընթաց այս օրենքի ընդունումից հետո: