Արտաշես Մխիթարյանն՝ իր պաշտոնանկության և թատրոնում աշխատել շարունակելու մասին

Արտաշես Մխիթարյանը չցանկացավ մեկնաբանել՝ ինչու է Տիգրան Ավինյանը մեկ ու կես տարվա նշանակումից հետո ազատել իրեն «Երևանի Հրաչյա Ղափլանյանի անվան դրամատիկական թատրոնի» տնօրենի պաշտոնից ու խուսափեց նշել պատճառները։ Ընդգծենք՝ Արտաշես Մխիթարյանը դրամատիկական թատրոնի տնօրենն էր 2023թ հունիսի 11-ից՝ 5 տարվա պաշտոնավարման ժամկետով էր նշանակվել։

«Այս պահին ցանկություն չունեմ խոսել այդ մասին, հիմա ուզում եմ ձեռնպահ մնալ որևէ մեկնաբանություն անելուց»,- Euromedia24-ի հետ զրույցում նշեց Արտաշես Մխիթարյանը։ 

Արդյոք իր համար անսպասելի՞ որոշում էր, այս հարցին ի պատասխան Մխիթարյանը բազմանշանակ պատասխան տվեց․ «Դե․․․ երևի», իսկ ներքին խնդիրներ են դրանք, թե պաշտոնից ազատումը կարող է նաև ունենալ ավելի խորքային պատճառ, օրինակ գործող իշխանությանը հրապարակայնորեն չսատարելով, ինչ անում են շատ գործիչներ, ընդհուպ բուհերի ռեկտորներ ու  մտավորականներ, բայց այս հարցին էլ դերասան, թատրոնի արդեն նախկին տնօրենը պարզաբանում չտվեց։ 

Իսկ կմնա՞ Արտաշես Մխիթարյանը նույն թատրոնում՝ որպես դերասան, եղել են մանրամասն քննարկումներ իր գործունեությունը նույն կոլեկտիվում շարունակելու վերաբերյալ, հետարքրվեցինք դերասանից, պատասխանեց․ «Այդ առումով էլ եմ ուզում ձեռնպահ մնալ։ Այո՛, մարտ ամսվա խաղացանկում կտեսնեք ինձ, խաղալու եմ դերեր, քանի որ արդեն իսկ կային  հայտարարված ներկայացումներ, որտեղ  ներգրավված եմ որպես արտիստ, հաջորդիվ ինչ կլինի՝ ժամանակը ցույց կտա»։ 

Նշենք, որ Երևանի քաղաքապետ Տիգրան Ավինյանի փետրվարի 24-ի որոշմամբ Արտաշես Մխիթարյանը 2025 թ-ի փետրվարի 28-ից ազատվել է «Երևանի Հրաչյա Ղափլանյանի անվան դրամատիկական թատրոն» համայնքային ոչ առևտրային կազմակերպության տնօրենի պաշտոնից։ Աշխատանքային վերջին օր համարվել է փետրվարի 27-ը: Ավինյանի մեկ այլ որոշմամբ այդ պաշտոնին նշանակվել է Գրիգոր Սուրենի Խաչատրյանը՝ որպես տնօրենի ժ/պ,  մինչև որ թատրոնի տնօրենի թափուր պաշտոնի համար  մրցույթ կհայտարարվի ու հաղթողի մասին  կհրապարակեն:

Սոնա Հարությունյան