Փաշինյանի ավտոշարասյան կողմից վրաերթից մահացած Սոնա Մնացականյանի հորեղբայրը դատական նիստին սրտամկանի կաթված է ստացել

Վարչապետ Նիկոլ Փաշինյանի ավտոշարասյան կողմից վրաերթի ենթարկված և մահացած հղի Սոնա Մնացականյանի գործով հերթական նիստի ընթացքում վերջինիս հորեղբայրը սրտամկանի ինֆարկտ է ստացել։ Այս մասին  Euromedia24-ին հայտնեց փաստաբան Րաֆֆի Ասլանյանը։ 

«Դատական նիստի ընթացքում նրա ինքնազգացողությունը վատացավ, շտապօգնության մեքենայով հիվանդանոց տեղափոխեցին, որտեղ էլ հայտնեցին, որ սրտամկանի կաթված է ստացել»,– ասաց Ասլանյանը։ 

Փաստաբանը նշեց նաև, որ օրեր առաջ էլ Սոնա Մնացականյանի հայրն էր սրտի հերթական վիրատահությունը տարել․ այդ պատճառով էլ այսօր չէր կարողացել մասնակցել դատական նիստին։ 

Նշենք, որ այսօր Երևանի ընդհանուր իրավասության քրեական դատարանում տեղի է ունեցել Սոնա Մնացականյանին վրաերթի ենթարկելու գործով դատական նիստը։ 

Հիշեցնենք, որ 2023 թ. ապրիլի 26-ին՝ ժամը 18:05-ի սահմաններում, Պարոնյան-Լեո փողոցների խաչմերուկում ՀՀ ոստիկանության «Ճանապարհային ոստիկանություն» ծառայության ուղեկցող սպայական վաշտի հրամանատարն իր կողմից վարած «Տոյոտա Պրադո» մակնիշի ավտոմեքենայով վրաերթի էր ենթարկել Արարատի մարզի 28-ամյա բնակչուհուն. նա տեղափոխվել էր «Նաիրի» բժշկական կենտրոն, որտեղ գիտակցության չգալով մահացել էր:

Սոնա Հարությունյան