Նիկոլ Փաշինյանը վաղը կգնա ԱԺ․ Անդրանիկ Քոչարյանին լավ օրեր չեն սպասվում (տեսանյութ)

Euromedia24-ի տեղեկություններով՝ վաղը Նիկոլ Փաշինյանը գնալու է խորհրդարան:

ԱԺ հերթական քառօրյա նստաշրջանի օրակարգում, ի թիվս այլ հարցերի, ընդգրկված է նաեւ ՀՀ կառավարության 2024թ-ի ծախսերի եւ կատարողականի զեկույցը, որը խորհրդարանում ներկայացնելու է Նիկոլ Փաշինյանը:

ԱԺ-ում քննարկվելու է նաեւ ԱԺ պաշտպանության եւ անվտանգության հարցերի մշտական հանձնաժողովի նախագահ Անդրանիկ Քոչարյանի վարքի դրսեւորման մասով էթիկայի հանձնաժողով ստեղծելու հարցը:

Հանձնաժողովը ստեղծելու համար փաստացի հիմք է հանդիսացել Անդրանիկ Քոչարյանի եւ լրագրողների միջեւ մարտի 20-ին տեղի ունեցած միջադեպը, որի ժամանակ Քոչարյանի վիրավորել էր լրագրողներին, մասնավորապես լրագրողին հորդորել էր «շուրթերը մաքրել»:

ԱԺ աշխատակազմն արդեն իսկ դրական եզրակացություն է տվել էթիկայի հանձնաժողով ստեղղելու՝ ընդդիմության նախաձեռնությանը:

Euromedia24-ի տեղեկություններով՝ ՔՊ-ականները եւս բավականին ոգեւորված են այս նախաձեռնությամբ, եթե չասենք՝ տարբեր խողովակներով խրախուսում են Քոչարյանի դեմ դուրս եկած լրագրողներին:

Ավելին, մեր տեղեկություններով՝ ԱԺ նախագահ Ալեն Սիմոնյանն իր աշխատասենյակում հանդիպել է ԱԺ-ն լուսաբանող լրագրողներից մի քանիսին եւ անթաքույց աջակել Քոչարյանի դեմ նախաձեռնությանը՝ հասկացնելով, որ հանձնաժողովը կձեւավորվի:

Հավելենք, որ ՔՊ-ն արդեն տեւական ժամանակ է մտադիր է պատժել Անդրանիկ Քոչարյանին, որն աջուձախ վարկաբեկում է իր թիմակիցներին, բայց փաստացի ՔՊ-ն որոշեց հենց լրագրողների հետ տեղի ունեցած միջադեպից հետո գործի անցնել ու պատժել Քոչարյանի:

ՔՊ-ն էթիկայի հանձնաժողով ստեղծելու հարցով որոշում կկայացնի այսօր՝ ֆրակցիայի նիստից հետո: