Հեղափոխության շնորհիվ ՀՀ պետբյուջե լրացուցիչ մուտք է եղել 4.2 մլրդ դոլար․ Փաշինյան

ՀՀ վարչապետ Նիկոլ Փաշինյանը հայտարարել է, որ հեղափոխությունից հետո՝ միայն 2024 թվականին, ՀՀ պետական բյուջե է մուտքագրվել հավելյալ 3.3 մլրդ դոլար։

«Պետք է ընդգծել, որ ժողովրդական, ոչ բռնի, թավշյա հեղափոխությունից առաջ՝ նախորդող տարիներին, ՀՀ պետական բյուջեի եկամուտներն աճել են, և սա որևէ մեկը չի կարող ժխտել։ Բայց 2018 թվականի հեղափոխությունը բյուջեի աճին նոր տեմպ է հաղորդել։ Բոլոր միջինացված թվերը հանած՝ միայն հեղափոխության բերած տեմպի շնորհիվ ՀՀ պետական բյուջե 2018-ից մինչև 2024 թվականը լրացուցիչ մուտքագրվել է ավելի քան 1 տրիլիոն 684 մլրդ դրամ կամ 4.2 մլրդ դոլար»,- նշել է Փաշինյանը։

Նրա խոսքով՝ այս թվի մեջ ներառված չեն պետական պարտքը և «Հայաստան» համահայկական հիմնադրամի կողմից 2020 թվականին պետբյուջե փոխանցված գումարները։

Փաշինյանը նշել է, որ սա ասում է՝ ի պատասխան այն քննադատությունների, թե իշխանությունը եկել է թալանածը հետ բերելու խոստումով և մոռացել այդ մասին. «Բա էս 4.2 մլրդ-ն օդի՞ց է ընկել, սիրելի ժողովուրդ։ Որտեղի՞ց»։

Նա նշել է, որ ստեղծվել են ապօրինի գույքի բռնագանձման համակարգ, որը պետք է տեղորոշի, գտնի, ապացուցի և վերադարձնի այն պետությանն ու ժողովրդին, եթե նույնիսկ դա թաքցնելու մանիպուլյատիվ սխեմաներ են գործարկվում։

«Ի՞նչ եղավ հեղափոխական իշխանությանը, արդյո՞ք կորցրել ենք մեր դուխը, ո՛չ, մենք հոգ ենք տանում մեր պետության ու ժողովրդի մասին, որովհետև վենդետա հիշեցնող որևէ գործողություն այնպիսի վնաս կհասցնի մեր պետության միջազգային կերպարին ու հեղինակությանը, որ նույնիսկ տասնյակ միլիարդավոր դոլարներով հնարավոր չի լինի վնասը վերականգնել»,- ասել է Փաշինյանը: