Եվրահանձնաժողովը Սլովակիայի հետ վերջնական քննարկումներ է անցկացնում Ռուսաստանի դեմ պատժամիջոցների 18-րդ փաթեթի շուրջ. Մերց

Եվրոպական հանձնաժողովը Սլովակիայի կառավարության հետ բանակցություններ է վարում Ռուսաստանի դեմ պատժամիջոցների 18-րդ փաթեթի շուրջ։ Այս մասին հայտարարել է Գերմանիայի կանցլեր Ֆրիդրիխ Մերցը ARD հեռուստաալիքին տված հարցազրույցում։

Նրա խոսքով՝ այս հարցը գտնվում է քննարկման վերջնական փուլում։

«Մենք փորձում ենք լուծել խնդիրը։ Ես մասնակցում եմ այս փորձերին։ Աշխատանքային մակարդակով ներկայումս փոխզիջում է որոնվում, այն կգտնվի, և այդ ժամանակ ուժի մեջ կմտնի պատժամիջոցների 18-րդ փաթեթը։ Մենք այն պատրաստել ենք, մենք կիրականացնենք», - ասել է քաղաքական գործիչը։

Նա հակառուսական սահմանափակումների այս փաթեթն անվանել է «ամենախիստը» «3,5 տարվա ընթացքում»։