Ջուր խմելու սովորությունը նվազեցնում է կաթվածի ռիսկը, հաստատում են գիտնականները

Կանոնավոր և բավարար քանակությամբ ջուր օգտագործելը կարող է 25%-ով նվազեցնել ինսուլտի ռիսկը։ Այդ եզրակացության են եկել չինացի գիտնականները։ Արդյունքները հրապարակվել են Journal of Stroke and Cerebrovascular Diseases (JSCD) գիտական հանդեսում։

Վերլուծության հիմքում օգտագործվել են ԱՄՆ-ի Ազգային առողջության և սննդի ուսումնասիրության (NHANES) տվյալները, որոնք ընդգրկում են 1999-ից մինչև 2020 թվականը ընկած ժամանակահատվածը։ Հետազոտության մեջ ներառվել է ավելի քան 49 հազար 20 տարեկանից բարձր մարդ։ Մասնակիցների մոտ 48%-ը տղամարդիկ էին։

Հեղինակները բացառել են տարիքից, սեռից և ընդհանուր կալորիականության ընդունումից բխող ազդեցությունները՝ կենտրոնանալով միայն հեղուկի օգտագործման ծավալի վրա։ Վերլուծությունը ցույց է տվել, որ այն մարդկանց մոտ, ովքեր ամենաշատ ջուրն էին օգտագործում, ինսուլտի ռիսկը քառորդով ցածր էր համեմատած նրանց հետ, ովքեր ուշադրություն չէին դարձնում ջրային հաշվեկշռի պահպանմանը։

Գիտնականներն առանձին վերլուծել են այն մասնակիցների առողջական պատմությունները, ովքեր օրական օգտագործել էին 1.4 լիտրից (մոտ վեց ստանդարտ բաժակ) պակաս հեղուկ։ Նրանց մոտ գլխուղեղի արյունամատակարարման խիստ խանգարումների հավանականությունը զգալիորեն բարձր էր։

Հետազոտողները ընդգծում են, որ ջրային հաշվեկշռի պահպանումը սրտանոթային հիվանդությունների կանխարգելման կարևոր և պարզ միջոց է։ Կանոնավոր և բավարար քանակությամբ ջուր օգտագործելը կարող է կարևոր գործոն լինել ինսուլտի ռիսկը նվազեցնելու հարցում՝ հատկապես միջին և մեծահասակ տարիքի մարդկանց համար։

Թարգմանությունը՝ Lurer.com-ի