ՀՀ–ի և ՌԴ–ի միջև առանց մուտքի արտոնագրի մասին համաձայնագրի փոփոխություններն ընդունվեցին

Հայաստանի և Ռուսաստանի քաղաքացիների՝ առանց մուտքի արտոնագրերի փոխադարձ այցելությունների մասին համաձայնագրում հայտագրերի փոխանակման ձևով փոփոխություններ կատարելու մասին համաձայնագիրն այսօր հավանության արժանացավ ՀՀ կառավարության նիստի ժամանակ։

Նշվում է, որ 2000 թ. սեպտեմբերի 25-ին ստորագրված «ՀՀ և ՌԴ քաղաքացիների առանց արտոնագրերի այցելությունների մասին» համաձայնագիրը կարգավորում է երկու պետությունների քաղաքացիների փոխայցելությունների ռեժիմը, մասնավորապես՝ համաձայնագրով սահմանվում է, որ մի կողմի պետության քաղաքացիները կարող են մուտք գործել, դուրս գալ, տեղաշարժվել և գտնվել մյուս կողմի պետության տարածքում առանց արտոնագրերի՝ քաղաքացիությունը հաստատող փաստաթղթերով:

Նշենք, որ 2024 թ. հունվարի 1–ից ուժը կորցրած է ճանաչվել նաև ՀՀ կառավարության 1998 թ. որոշմամբ սահմանված ՀՀ քաղաքացու անձնագրում օտարերկրյա պետություններում անձնագրի վավերականության ժամկետի վերաբերյալ նշում կատարելու իրավական հիմքը:

Կառավարությունից հայտնում են նաև, որ համաձայնագրի կնքումը բխում է «Հայաստան–Ռուսաստան երկկողմ համագործակցության օրակարգի բոլոր ուղղություններից` ներառյալ ռազմաքաղաքական, տնտեսական, էներգետիկ, տրանսպորտային, հումանիտար, մշակութային ոլորտները, Ռուսաստանի հետ դաշնակցային հարաբերությունների ու ռազմավարական գործընկերության ամրապնդման և ընդլայնման ռազմավարությունից: