Ես տեսել եմ հայկական կոնյակ, որ արտադրվում է ՀՀ-ից դուրս ու վաճառվում․ Մհեր Գրիգորյան

Մենք երկար ժամանակ կոնյակ էինք արտահանում ու որակի ստուգման հետ կապված հարց ունեինք, չէինք ստուգում, որովհետև լաբորատոր կարողությունները չունեինք, այլ երկրներից ոմանք ստուգում էին, մյուսները՝ ոչ։ Արդյունքում կարծիք էր հնչում, որ իբրև կար Հայաստանից արտահանվող կոնյակի մեծ խմբաքանակ, որ խաղողի սպիրտից չէ։ Այս մասին կառավարության նիստի ընթացքում ասաց ՀՀ էկոնամիկայի նախարար Գևորգ Պապոյանը։ 

«Այլ երկիր հիմա ստուգում է իրականացնում և 95 տոկոս, այսինքն, 15 անվտոմեքենա՝ 15-ը դրական է, 20 ավտոմեքենա՝ 19-ը դրական, 1-ը՝ բացասական, 2 մեքենա՝ 1-ը դրական, 1-ը՝ բացասական, 17 մեքենա ՝ 17-ը դրական։ Այսինքն, վիճակագրությունը ցույց է տալիս, որ 95 տոկոս դրական արդյունք ունենք, ու դրանք կուտակված մեքենաներն են եղել։ Մարդիկ չեն էլ իմացել, որ դրանք պետք է ստուգման ենթարկվեն։ Իրականում մենք չգիտենք ինչ ենք արտադրում, պարզվում է՝ լավ էլ որակով արտադրանք ենք թողարկում։ Ինքս էլ հաճելիորեն զարմացած եմ։ Ու սա միջազգային կազմակերպություններն էլ են արձանագրում»։ 

Նա նաև հայտնեց, որ 2025 թ-ի օգոստոսից Հայաստանում կլինի կոնյակի իզոտոպային ստուգում իրականացնող լաբորատորիա։ 
Փոխվարչապետ Մհեր Գրիգորյանն էլ  արձանագրեց, որ շատ հոգատար պետք է լինենք մեր արտադրանքի որակի նկատմամբ, քանի որ 1 անորակ խմբաքանակի պատմությունը մամուլով սկսում է շրջանառվել ու դառնում է գնահատական ընդհանուր արտադրանքի մասին, ինչն անթույլատրելի է։ «Մենք այդքան խոսում ենք կոնյակից, բայց ես վստահ եմ, որ 95 տոկոսով և ավելի որակյալ արտադրանք է։ Ես տեսել եմ կոնյակ, որ արտադրվել է, ոչ Հայաստանում, բնականաբար, այդ որակի ազդեցությունը տարածվում է մեր արտադրանքի վրա։ Պետք է մեխանիզմ գտնենք, թե ոնց մոնիթորինգ անենք։ Սա նաև գյուղմթերքին է վերաբերում։ Ես գիտեմ շուկաներ, որտեղ ոչ հայկական գյումթերքը վաճառվում է որպես հայկական, որովհետև հայկական այդ արտադրանքը ունի լավ ռեպուտացիա»։